Հուլիսի 6-ին ԱՄՆ պետքարտուղար Ջոն Քերին ժամանել է Վրաստան, որտեղ նրա և վրաստանցի պաշտոնյաների հանդիպումներից հետո ստորագրվել է ԱՄՆ-ի և Վրաստանի միջև պաշտպանական համագործակցության հուշագիրը, որը հրապարակվել է այսօր՝ հուլիսի 7-ին:
Հուշագրում ասվում է, որ Վրաստանի զինված ուժերի պաշտպանական հնարավորությունները կատարելագործելու համար ԱՄՆ-ն մտադիր է խորացնել համագործակցությունը Վրաստանի հետ՝ օժանդակելով սպառազինության մատակարարումներին, մարզելով զինծառայողներին, զարգացնելով Վրաստանի կիբերանվտանգության մակարդակը:
Հուշագրի համաձայն՝ կանցկացվեն երկու երկրների զինված ուժերի համատեղ զորավարժություններ, կբարձրացվի Վրաստանի զինված ուժերի մարտունակությունը՝ ՆԱՏՕ, ԵՄ, ՄԱԿ առաքելություններին մասնակցության համար:
Բացի այդ կողմերը կհամագործակցեն ցամաքային, ծովային և օդային անվտանգության ոլորտներում, ինչպես նաև ինֆորմացիա կփոխանակեն «թշնամական գործողությունների» վերաբերյալ:
Հուշագրի ստորագրումից հետո անցկացվել է նաև մամուլի ասուլիս, որի ժամանակ ԱՄՆ պետքարտուղար Քերին մասնավորապես նշել է. «Մենք բարձր ենք գնահատում այսօր ստորագրված հուշագրի կարևորությունը: Այն ենթադրում է պաշտպանական և այլ սպառազինության գնումներ, ինչը կբարձրացնի Վրաստանի ԶՈւ և ՆԱՏՕ-ի համատեղելիությունը»: