Բալթյան նավատորմում կարգուկանոնի վերականգման համար ստեղծված հատուկ հանձնաժողովը գլխավորում է Ռուսաստանի պաշտպանության նախարարի տեղակալ Տիմուր Իվանովը: Այս մասին այսօր՝ հուլիսի 6-ին, հայտնում է ռուսաստանյան «ՏԱՍՍ» գործակալությունը՝ հղում անելով սեփական աղբյուրներին:
Մինչ այս՝ հունիսին, ՌԴ Բալթյան նավատորմում ծառայողական պարտականություններից ազատվել է 36 սպա: Fontanka լրատվակայքն էլ, հղում անելով սեփական աղբյուրներին, հայտնում է, որ ծառայությունից ազատվել է 50 սպա:
Հատուկ հանձնաժողովը պաշտպանության փոխնախարարի ղեկավարությամբ աշխատելու է մի քանի ամիս և կազմակերպելու է Բալթյան նավատորմի ցամաքային, ռազմածովային ուժերի տեխնիկան և զորքերը կարգի է բերելու աշխատանքները: Զինվորականների՝ պաշտոնից ազատման և նոր կադրերի առաջխաղացման արդյունքում վերադասավորումներ են լինելու Ռուսաստանի բոլոր 4 նավատորմերի սպայական կազմերում:
Ավելի վաղ՝ հուլիսի 1-ին, Բալթյան նավոտորմի զինվորական դատախազը տեղեկացրել է նավատորմում հայտնաբերված խախտումների, զորքերի ամենօրյա գործունեության հետ կապված բացթողումների, անձնակազմի տեղաբաշխման թերությունների մասին: Հայտնաբերվել են ռազմական և սոցիալական օբյեկտների. բնակարանների կառուցման, սննդի կազմակերպման և զինվորական ավանների սպասարկման խախտումներ:
ԶԼՄ-ներում քննարկվում է, որ ՊՆ ղեկավարության համար վերջին կաթիլը եղել է նավատորմի Բ-265 «Կրասնոդար» սուզանավի վթարային վիճակի կոծկման փորձը: Խոսակցությունների համաձայն՝ այս տարվա ապրիլի 20-ին Բալթյան ծովում ՌԴ ԶՈւ սուզանավը բախվել է Լեհաստանի ԶՈւ Orzel սուզանավին: Այս տարբերակը, սակայն, Լեհաստանի պաշտպանության նախարարությունը հերքել է:
Ըստ ռուսաստանյան «Կոմերսանտ» պարբերականի՝ իրականում «Կրասնոդարը» ստացել է կորպուսի և որոշ ագրեգատների վնասվածքներ անհաջող մանևրի ընթացքում. ենթադրաբար սուզանավը բախվել է որևէ օբյեկտի: Իսկ զեկույցների մեջ Բալթյան նավատորմի ղեկավարությունը զգալիորեն ավելի մեղմ է ներկայացրել սուզանավի վնասվածքները:
ՌԴ պետդումայի պաշտպանության հարցերի հանձնաժողովի ղեկավար Վլադիմիր Կոմոյեդովը տեղեկացրել է, որ դժգոհություններ եղել են ոչ միայն նավատորմի մարտական պատրաստության վերաբերյալ, այլ նաև թիկունքային ապահովման, զինծառայողների սննդի կազմակերպման հարցերում: Բացի այդ, զինծառայողների բավարարումը չեն տվել նրանց արձակուրդների ժամանակ, ինչի համար նաև հարուցվել է քրեական գործ:
Մայիսի 11-ից հունիսի 10-ը կատարված ստուգումների արդյունքում հունիսի 29-ին ՌԴ պաշտպանության նախարար Սերգեյ Շոյգուն ազատել էր Բալթյան նավատորմի հրամանատար, փոխծովակալ Վիկտոր Կրավչուկին և շտաբի պետ, փոխծովակալ Սերգեյ Պոպովին՝ մարտական պատրաստության մեջ լուրջ բացթողումների, ՊՆ-ին ներկայացրած կեղծ զեկույցների պատճառով: Նրանք ներկայացվել են մարտական և առհասարակ զինվորական ծառայությունից ազատման:
ՌԴ պաշտպանության նախարարը նավատորմի նոր ղեկավար է նշանակել փոխծովակալ Ալեքսանդր Նոսատովին, ով նախկինում ղեկավարել է ՌԴ ԶՈւ ռազմածովային ակադեմիան, իսկ մինչ այդ ՌԴ ԶՈւ սևծովյան նավատորմը: Բալթյան նավատորմի շտաբի պետի պարտականությունները կիրականացնի փոխծովակալ Իգոր Մուխամետշինը:
Հոդվածի հեղինակ Նազենիկ Սարոյան:
Pingback: ՌԴ ԶՈւ Բալթյան նավատորմը զանգվածային ազատումներից հետո նոր հրամանատար ունի | Ռազմ.info