Առաջնագում հանգիստ է եղել • Ջրահեղձ է եղել ՀՀ ԶՈւ զինծառայող • Հայաստանը վավերացրել է ՀՀ-ՌԴ միացալ ՀՕՊ-ի ստեղծման համաձայնագիրը • Մեկնարկել է ամառային զորակոչը • ՊԲ-ում անցկացվել է հետազոտական զորավարժություն • ՀՀ ԶՈւ զինծառայողները վերապատրաստվում են Վրաստանում • ՀՀ ՊՆ-ում քննարկել են հունիսի աշխատանքները • Սեյրան Օհանյանը խոսել է պաշտոնանկությունների մասին • Դավիթ Փախչանյանը ներկայացրել է ՀՀ ռազմարդյունաբերության կարողությունները • Անցկացվել է ԱԹՍ-ների մրցույթ • ՀԱՊԿ ԱԳ նախարարները կհանդիպեն Հայաստանում • Հայաստանը կմասնակցի ՀԱՊԿ զորավարժությանը • ՀՀ ՊՆ-ում ընդունել են Մեծ Բրիտանիայի զինվորականներին • ՀՀ ՊՆ-ում քննարկել են ռազմական կրթության հարցեր • Բարերարները ԶՈւ-ին են փոխանցվել վերակենդանացման շարժական համալիրներ • ՌԴ ԶՈւ ռազմաբազան խոշոր զորավարժություն կանցկացնի Հայաստանում
• Շաբաթվա ընթացքում Ադրբեջանի զինուժը հայկական բանակի դիրքերին կրակել է հիմնականում հրաձգային զինատեսակներով, այդ թվում՝ գնդացիրներով և դիպուկահար հրացաններով։ Հունիսի 30-ին հակառակորդը Թալիշի ուղղությունում կրակել է հացահատիկի բերքահավաք անող քաղաքացիականների ուղղությամբ, տուժածներ չեն եղել։
• Հունիսի 29-ին Երևանի Նուբարաշենի պոմպակայանի ավազանում ջրահեղձ է եղել ՀՀ ԶՈւ զինծառայող Էդգար Չախլյանը:
• Հունիսի 30-ին Հայաստանի Ազգային ժողովը վավերացրել է 2015թ. դեկտեմբերին ստորագրված «ՀՀ և ՌԴ միջև Հավաքական անվտանգության կովկասյան տարածաշրջանում ՀՕՊ միավորված տարածաշրջանային համակարգ ստեղծելու մասին» համաձայնագիրը, որի նպատակը կովկասյան տարածաշրջանում հակաօդային պաշտպանության համատեղ իրականացումն է։
• Հուլիսի 1-ին մեկնարկել է Հայաստանի զինված ուժերի 2016թ. ամառային զորակոչը: Նույն օրը տարածքային զինկոմիսարիատներից պարտադիր ժամկետային զինվորական ծառայության են մեկնել առաջին նորակոչիկները:
• Նախորդ շաբաթ Պաշտպանության բանակի առանձին մոտոհրաձգային բրիգադի ստորաբաժանումներից մեկի ներգրավմամբ անցկացվել է հետազոտական զորավարժություն, որի ժամանակ փորձարկել են մարտավարական նոր դրվագներ, փոխգործակցության կազմակերպման և մարտի վարման նոր տարբերակներ:
• Հունիսի 28-ին ՆԱՏՕ-ի «Գործընկերություն հանուն խաղաղություն» ծրագրի շրջանակներում Վրաստանում մեկնարկել է Սաչխերեի լեռնային պատրաստության դպրոցի ամառային հիմնական վերապատրաստման փուլը, որին մասնակցում են նաև Հայաստանի զինված ուժերի զինծառայողները:
• Հունիսի 30-ին ՀՀ ՊՆ-ում քննարկվել են հունիսին զինված ուժերում իրականացված միջոցառումների արդյունքներն ու առաջիկա անելիքները: Պաշտպանության նախարարը հրահանգել է կանխարգելել զինանձնակազմի արևահարումները։
• Հունիսի 29-ին Հայրենիքի համար նահատակվածների և անհայտ կորածների հիշատակի օրվա կապակցությամբ «Եռաբլուր» պանթեոն են այցելել ՀՀ պաշտպանության նախարար Սեյրան Օհանյանը, ՀՀ ՊՆ և ԶՈւ ղեկավար կազմը, անհայտ կորած ազատամարտիկների հարազատներ:
«Եռաբլրում» նախարար Օհանյանը պատասխանել է նաև լրագրողների հարցերին և մասնավորապես անդրադարձել զինված ուժերում կոռուպցիայի դեմ պայքարին և պաշտոնանկություններին:
«Իմ պաշտոնավարման ընթացքում գնդապետից բարձր պաշտոններից ազատվել է շուրջ 140 հոգի, որոնցից շուրջ 60-ն այն պաշտոններից են, որոնց մեջ կան կոռուպցիոն ռիսկեր», — նշել է Սեյրան Օհանյանը։
• Հունիսի 30-ին հրապարակված հարցազրույցում ՀՀ ՊՆ տեղակալ — ՀՀ ՊՆ ռազմարդյունաբերության պետական կոմիտեի նախագահ Դավիթ Փախչանյանը պատմել է ՀՀ ռազմարդյունաբերական ոլորտի կարողությունների և զարգացման հնարավորությունների մասին:
• Հուլիսի 2-ին Արզնիում անցկացվել է անօդաչու թռչող սարքերի առաջնություն, որի մասնակից թիմերի ԱԹՍ-ները պետք է թռչեին դեպի կոորդինատներում տրված տեղը, 5 մետր տրամագծով նպատակակետի վրա գցեին ծանրոցը և վերադառնաին։ Ռազմինֆոն մրցույթի ընթացքը ներկայացրել է ֆոտոռեպորտաժով։
• Հուլիսի 4-ին ՀԱՊԿ պետությունների ԱԳ նախարարները Երևանում ի թիվս այլ հարցերի, քննարկվելու են մինչև 2025թ. ժամանակահատվածի համար ՀԱՊԿ հավաքական անվտանգության ռազմավարությունը:
• Ռուսաստանում մեկնարկել են օգոստոսին անցկացվելիք ՀԱՊԿ «Փոխգործակցություն-2016» զորավարժության նախապատրաստական աշխատանքները։ Զորավարժությանը մասնակցելու է նաև Հայաստանը։
• Հունիսի 28-ին ՀՀ ՊՆ 1-ին տեղակալ Դավիթ Տոնոյանն ընդունել է Մեծ Բրիտանիայի ԶՈւ 160-րդ Ուելսյան հետևակային բրիգադի պատվիրակությանը և քննարկել նոր ոլորտներում փոխգործակցության հնարավորությունները։
• Հունիսի 27-30-ին ՀՀ-ՆԱՏՕ պաշտպանական համագործակցության շրջանակներում ՀՀ ՊՆ-ում անցկացվել է կրթության բնագավառի մասնագետների հերթական ամենամյա համաժողով, որը նվիրված էր խառը, ակտիվ և վերափոխումային ուսուցման եղանակներին ու մեթոդներին:
• Հուլիսի 1-ին Հայաստանում ավարտվել է Ռուսաստանի զինված ուժերի 102-րդ ռազմաբազայի դաշտային ելքը, որով ռազմաբազան պատրաստվել է հուլիսի կեսերին ամբողջ անձնակազմով զորավարժության անցկացմանը:
Հայաստանի նախորդ ռազմաշաբաթն այստեղ։