Մայիսի 17-ին Eurasianet.org կայքի հոդվածում նշվում է, թե վերջին 10 տարիների ընթացքում Ադրբեջանը ԱՄՆ-ից ստացել է 20 մլն դոլարի ռազմական օգնություն, մինչդեռ Հայաստանը՝ ընդամենը 41 հազար դոլարի: Սակայն այս թվերը չեն արտահայտում ամբողջ պատկերը:
ԱՄՆ-ից ռազմական օգնության մասին բոլոր տվյալները համադրելով, Ռազմինֆոն պարզել է, որ Ադրբեջանը ստացել է ոչ թե 20, այլ՝ մոտ 108 միլիոն դոլարի օգնություն, իսկ Հայաստանը՝ մոտ 7 միլիոն դոլարի:
Eurasianet-ի հոդվածագիրն իր հաշվարկն արել է ԱՄՆ ռազմական օգնության միայն 2 ծրագրի հիման վրա (Section 1004, Section 1206), որոնցից Հայաստանը ներառված է միայն մեկում, բայց Securityassistance.org կայքը, որտեղից հեղինակը վերցրել է տվյալները, տալիս է ռազմական օգնության ևս 12 ծրագրի անուն, որոնց տվյալներն էլ ներկայացնում ենք ստորև (թվերը նշված են դոլարով):
Ծրագրեր | Հայաստան | Ադրբեջան |
Combating Terrorism Fellowship Program | 409 177 | 1 978 963 |
Cooperative Threat Reduction | 1 100 000 | 81 036 000 |
Global Lift and Sustain | 950 000 | 300 000 |
International Counterproliferation Programs | 1 860 000 | 1 520 000 |
Non-Security Assistance ” Unified Command | 112 849 | 1 816 941 |
Regional Centers for Security Studies | 1 896 019 | 2 265 792 |
Section 1004 Counter-Drug Assistance | 41 000 | 5 866 000 |
Wales Initiative | 850 000 | 850 000 |
Aviation Leadership Program | * | 125 829 |
Misc Dept of State & Dept of Defense Non-Security Assistance | * | 25 000 |
Section 1206 Train and Equip Authority | * | 11 476 598 |
Service Academies | * | 287 720 |
Ընդհանուր | 7 219 045 | 107 548 843 |
*-ով նշված ծրագրերում Հայաստանը ներգրավված չէ:
Բոլոր ծրագրերով ստացված օգնության չափերը նշելը էական է, քանի որ միայն հոդվածում նշված ծրագրերով ստացվում էր, որ Ադրբեջանը ստանում է 20 մլն դոլար, Հայաստանը՝ 41 հազար:
Իսկ բոլոր ծրագրերի համեմատության դեպքում ստացվում է, որ Ադրբեջանն ընդհանուր ստացել է 108 մլն դոլարի, իսկ Հայաստանը՝ 7 մլն դոլարի ռազմական օգնություն:
Նշենք, որ ԱՄՆ օգնության այս ծրագրերը նախատեսում են ռազմական և նյութական օժանդակություն ցուցաբերել տարբեր ոլորտներում, որոնցից են՝ թմրանյութերի ապօրինի շրջանառության դեմ պայքարը, աղետների ժամանակ փոխօգնությունը, ահաբեկչության դեմ պայքարը ևն: Ծրագրերի շրջանակներում նախատեսված են նաև ԱՄՆ-ում ռազմական կրթություն ստանալու հնարավորություններ և վերապատրաստման տարբեր դասընթացներ:
Նմանատիպ ծրագրերին մասնակցում են բոլոր հետխորհրդային երկրները, բացի Բելառուսից, ինչն ամենայն հավանականությամբ բացատրվում է այդ երկրի դեմ ԱՄՆ պատժամիջոցներով:
Հոդվածի հեղինակ՝ Հայկ Խաչիկյան:
Pingback: ԱՄՆ ռազմական օգնությունը Հայաստանին և Ադրբեջանին. ընդլայնված ցուցակ | Ռազմ.info