Մայիսի 27-ին Արցախի վարչապետ Արայիկ Հարությունյանն Արցախի հանրային հեռուստաընկերության հետ հարցազրույցում հայտնել է, որ արցախցի աշխատող կամավորականներն առաջնագծում գտնվելու ընթացքում նույնպես ստացել են իրենց աշխատավարձերը, իսկ չաշխատող կամավորականների համար պետական դրամական օգնություն է տրամադրվել:
Կամավորականն Արցախի առաջնագծում, ապրիլ 2016. լուսանկարը «Պանարմենիան» գործակալության
Արցախի կառավարությունը, վարչապետ Հարությունյանի խոսքով, նախ լուծել է կամավորականներին պարենով ապահովելու խնդիրները, բայց բացի դրանից, պետական աշխատողները ժամանակին ստացել են նաև իրենց աշխատավարձերը: Մասնավոր սեկտորում աշխատող կամավորականները նույնպես հիմնականում ժամանակին ստացել են իրենց աշխատավարձերը, սակայն եղել են նաև ուշացումներ:
Ինչ վերաբերում է այն կամավորականներին, որոնք չունեին ֆիքսված եկամտի աղբյուր, կատարում էին սեզոնային աշխատանքներ և այլն, ապա Արցախի կառավարությունը նրանց համար սահմանել է համապատասխան դրամական օգնություն:
«Մի կանխավճարի տեսքով Պաշտպանության բանակն արդեն փոխանցել է նրանց, բայց դա մի մասն է, ավելացնելու են: Եվ փորձելու ենք, որ գոնե նվազագույն նյութական աջակցություն ցուցաբերենք: Նաև կարող եմ հայտարարել, որ [դրույքաչափն] այսօր հաշվվում է մեկ օրվա համար միջինը 5 հազար դրամի չափով», — ասել է Արցախի վարչապետը:
Ներկայում դիրքերում կամավորականների անհրաժեշտության մասին լրագրողի հարցին պատասխանելով Արայիկ Հարությունյանը նաև նշել է, որ կամավորների՝ դիրքերում լինելը միշտ է պահանջված, որովհետև առաջին հերթին ոգևորում է զինվորներին: Սակայն հաշվի առնելով նաև տնտեսության պահանջը, որոշ ժամանակ անց անհրաժեշտ կլինի, որ կամավորականները վերադառնան իրենց առօրյա աշխատանքին:
Արայիկ Հարությունյանը հարցազրույցի ժամանակ խոսել է նաև ապրիլյան մարտերի ժամանակ մատակարարման, քաղպաշտպանության, տեղահանվածների տեղավորման և տնտեսության վերականգնման թեմաներով: Հարցազրույցի ամբողջական տեսագրությունը՝ ստորև:
Pingback: Արցախցի կամավորականներին ամեն օրվա համար 5000-ական դրամ կվճարվի | Ռազմ.info
Pingback: Ռազմաշաբաթ. Հայաստան. 29 մայիսի – 4 հունիսի, 2016 | Ռազմ.info