Թուրքիայում ոստիկանական մեքենա է պայթեցվել. կան զոհեր

Երեքշաբթի Թուրքիայի հարավ-արևելքում գտնվող Տունջելի քաղաքում ժամը 19:00-ի սահմաններում ոստիկանական զրահամեքենա է պայթեցվել, ինչի հետևանքով մահացել է թուրք վեց հատուկջոկատային և մոտակայքում գտնվող մեկ կին: Այդ մասին հայտնել են թուրքական լրատվամիջոցները՝ հղում կատարելով Թուրքիայի ուժային կառույցների աղբյուրներին:
CNN-Turk հեռուստաընկերության տվյալներով՝ ընթացքի մեջ գտնվող մեքենան պայթեցվել է ճանապարհին տեղադրված հեռակառավարվող պայթուցիկ սարքի միջոցով: Այնուհետև մեքենայում հրդեհ է բռնկվել, և կրակը տարածվել է երկու այլ մեքենաների վրա:
Տեղական ինտերնետ-լրատվամիջոցները հայտնում են, որ ըստ ոչ պաշտոնական տեղեկությունների՝ պայթյունի հետևանքով մի քանի մարդ է վիրավորվել, այդ թվում՝ զոհված կնոջ ամուսինը:
Հաղորդվում է, որ հարձակումն իրագործել են ՔԲԿ մարտիկները:
Տունջելին արգելափակված է անվտանգության ուժերի կողմից: Քաղաք «Շտապ օգնության» և հրշեջ ծառայության մեքենաներն են մեկնել:
Ըստ NTV հեռուստաընկերության՝ թաղամասում, որտեղ տեղի է ունեցել միջադեպը, կրակոցներ են լսվում: Հավանաբար անվտանգության ուժերը միջոցառումներ են իրականացնում մարտիկների հայտնաբերման ուղղությամբ: