Մայիսի 24-26-ին Հայաստանի «Բաղրամյան» զորավարժարանում անցկացվելու է ՀԱՊԿ «Կոբալտ-2016» զորավարժությունը, որին մասնակցելու են ՀԱՊԿ պետությունների ներքին զորքերի այն ստորաբաժանումները, որոնք մտնում են ՀԱՊԿ օպերատիվ արձագանքման հավաքական ուժերի (ՕԱՀՈւ) հատուկ նշանակության ուժերի կազմավորումների մեջ: Այս մասին տեղեկացնում է ՀԱՊԿ կայքը:
ՀԱՊԿ օպերատիվ արձագանքման հավաքական ուժերի դեսանտավորում «Փոխգործակցություն-2015» զորավարժության ակտիվ փուլում (արխիվ)
Զորավարժության ընթացքում ստորաբաժանումները կատարելու են հետևյալ խնդիրները.
- Ահաբեկչական կազմակերպությունների գործունեության կանխարգելում,
- Զենքի, պայթուցիկ նյութերի և թմրանյութերի ապօրինի շրջանառության սահմանափակում,
- Հատուկ նշանակության ուժերի և միջոցների ղեկավար մարմինների գործողությունների ստուգում,
- Անձնակազմի մարտական պատրաստության կատարելագործում:
Զորավարժությանը մասնակցելու են ՀԱՊԿ անդամ բոլոր 6 պետությունների ներքին զորքերի հատուկ նշանակության ստորաբաժանումներ, կիրառվելու են հարվածային և բեռնատար ուղղաթիռներ: Զորավարժության ընթացքին հետևելու է ՀԱՊԿ գլխավոր քարտուղար Նիկոլայ Բորդյուժան:
Նշենք, որ «Կոբալտ-2016» զորավարժության անցկացման մասին 2015-ի սեպտեմբերին ՀԱՊԿ-ում Հայաստանի նախագահության առաջնահերթությունները ներկայացնելիս տեղեկացրել է Հայաստանի նախագահ Սերժ Սարգսյանը:
Ավելացնենք, որ Հայաստանը շարունակաբար նախաձեռնում է ՀԱՊԿ ռազմական բաղադրիչի ընդլայնման, կատարելագործման, համատեղ զորավարժությունների անցկացման որոշումներ: