Սեպտեմբերի 24-ին կմեկնարկի Համաբանակային 15-րդ սպարտակիադան

Ինչպես տեղեկացնում են պաշտպանության նախարարությունից, սեպտեմբերի 24-ին ժամը 11:00-ին Վազգեն Սարգսյանի անվան հանրապետական մարզադաշտում կունենա Համաբանակային 15-րդ սպարտակիադայի պաշտոնական բացման հանդիսավոր արարողությունը: Բացման խոսքով հանդես կգա ՀՀ պաշտպանության նախարար Սեյրան Օհանյանը:
Սպարտակիադայի բացմանն առաջինը մարզադաշտ կմտնի ՀՀ ՊՆ նվագախումբը: Հայրենիքի պաշտպանության համար զոհված ազատամարտիկների հիշատակը հարգելու համար կհայտարարվի լռության րոպե:
Այնուհետև պաշտպանության նախարարի հրամանով ներս կբերվի և առաջին անգամ կներկայացվի Սպարտակիադայի դրոշը: Դրոշն առաջին անգամ կներկայացնեն և մարզադաշտ կմտցնեն ֆիզիկական պատրաստության բաժնի հիմնադիրները` պահեստազորի գնդապետ Ն. Եղոյանի գլխավորությամբ: Դրոշը բարձրացնելու պատիվը կտրվի ԱՊՀ մասնակից պետությունների 9-րդ սպարտակիադայի մրցանակակիրներին:
Մինչ մրցումների մեկնարկը, պաշտպանության նախարարի կողմից մրցանակներ ու պարգևներ կստանան 2012թ. ընթացքում մարզական բարձր ցուցանիշների հասած զինծառայողները: Համաբանակային 15-րդ սպարտակիադայի հանդիսավոր բացումը կեզրափակվի համերգային ծրագրով:
ՀՀ զինված ուժերի սպարտակիադան նպատակաուղղված է զորամասերում զինծառայողների ֆիզպատրաստության մակարդակի բարձրացմանը, մարզաբազաների կառուցմանը և բարեկարգմանը, զինծառայողների ակտիվ հանգստի բովանդակալից կազմակերպմանը, լավագույն մարզիկների հայտնաբերմանը, հավաքական թիմերի համալրմանը, մարտական պատրաստության գործընթացում ֆիզիկական պատրաստության դերի ու նշանակության բարձրացմանը:
Նշենք, որ Համաբանակային սպարտակիադան կանցկացվի 3 փուլով. ներզորամասային, ներկորպուսային և համաբանակային: