Ապրիլի 29-ին Ուկրաինայում Ադեևկայի շրջանում մահացել է Ուկրաինայի քաղաքացի, ազգությամբ վրացի մարտիկ Ռեզո Ծիկլաուրին։ Այս մասին տեղեկացնում է Ուկրաինայում «Վրացական ազգային լեգիոնի» ֆեյսբուքյան էջը՝ նշելով, որ լեգիոնի անդամներից շատերը ճանաչել են Ծիկլաուրին։
Ուկրաինայում զոհված ազգությամբ վրացի մարտիկ Ռեզո Ծիկլաուրին
Ինչպես հաղորդում է ֆեյսբուքյան էջը, Ռեզո Ծիկլաուրին կռվել է Ուկրաինայի 81-րդ առանձին աերոմոբիլային բրիգադի 90-րդ գումարտակի կազմում։ Ուկրաինայի քաղաքացի է եղել, ապրել է Շեպետովկա գյուղում։ Սպանվածն ուներ 2 երեխա։
Հավելենք, որ 2014-16թթ. ընթացքում հայտնի է դարձել 8 վրաստանցի զինծառայողի սպանվելու մասին։ Սակայն զոհվածներից մեկը, ինչպես հայտնում էին վրաստանյան լրատվամիջոցները, կռվել է ոչ թե Ուկրաինայի կառավարական ուժերի շարքերում, այլ ռուսական կողմում։
- 2014թ. դեկտեմբերի 18-ին Ուկրաինայում զոհվել էր 32-ամյա Ալեքսանդր Գրիգոլաշվիլին։ Նա ծառայել է Վրաստանի զինուժում 2007-08թթ, կռվել է Դոնբասում ուկրաինական «Այդար» գումարտակի կազմում։
- 2015թ. հունվարի 15-ին հայտնի դարձավ, որ Դոնեցկում մահացել է Վրաստանի քաղաքացի Շալվա Բուխաիձեն։ Նրա մահվան լուրը հաստատել էր Վրաստանի ԱԳՆ-ն, հենց այս զինծառայողի մասին էլ շրջանառվում էր, որ կռվել է ռուսական կողմում։ Ամենայն հավանականությամբ այս լուրը համապատասխանում է իրականությանը, քանի որ վրաստանյան մամուլը, ինչպես նաև Միխեիլ Սաակաշվիլին Ուկրաինայում մահացածների թվում նրան չեն ընդգրկում։
- 2015թ. հունվարի 18-ին Դոնեցկում մարտական գործողությունների ընթացքում մահացել է 37-ամյա Թամազ Սուխիաշվիլին ։ Եվս 3 վրաստանցի մարտիկ վիրավորվել էին։
- 2015թ. ապրիլի 18-ին Դոնեցկի շրջանի Շիրոկինո գյուղի մարտերում զոհվել էր Վրաստանի քաղաքացի Գեորգի Ջանելիձեն։ Վերջինս ծառայել է կառավարական ուժերի «Ազով» գնդում որպես վրաստանցի կամավորական։
- 2015թ. հուլիսի 2-ին Վրաստանի նախկին նախագահ Միխեիլ Սաակաշվիլին հայտնել է, որ Ազովի ծովում խեղդվել է Ուկրաինայի կառավարական ուժերի շարքում կռվող վրաստանցի սպա Կոնստանտին Լաշխիան։
- 2015թ. օգոստոսի 9-ին վրաստանյան ընդդիմադիր «Թավիսուպալի զոնա» (Ազատ գոտի) պորտալը հայտնել է, որ Ուկրաինայի արևելքում՝ Դոնեցկի մերձակայքում, ռումբի պայթյունի հետևանքով զոհվել է այնտեղ մարտնչող վրաստանցի կամավորական Գեորգի Բարատելին։ Վերջինս կռվել է ուկրաինական ուժերի 93-րդ գումարտակի շարքերում։
- 2015թ. դեկտեմբերի 10-ին Վրաստանի նախկին նախագահ, այժմ Օդեսայի նահանգապետ Միխեիլ Սաակաշվիլին ֆեյսբուքյան իր էջում գրել էր, որ Դոնբասի Օպիտնոե գյուղի մերձակայքում սպանվել է այնտեղ մարտնչող ևս մեկ վրաստանցի կամավորական։ Իրակլի Կուտելիան պայթել է ականի վրա ևս 2 մարտիկի՝ Ալեքսեյ Բոլդիրևի և Անդրեյ Կուպրիյանովի հետ։ Եվս 7 հոգի վիրավոր է։
Նշենք, որ Ուկրաինայում կռվող վրաստանցիների թեման բավական շահարկվում է, քանի որ խոսակցություններ կային, թե վրաստանցի զինծառայողներն ազատվում են Վրաստանում իրենց աշխատանքից և տեղափոխվում Ուկրաինա կռվելու։ Սրա վերաբերյալ հայտարարություն էր արել Միխեիլ Սաակաշվիլին, նշելով, որ մարդիկ ազատվում են ինչպես ԶՈւ-ի, այնպես էլ ՆԳՆ-ի իրենց ծառայությունից։ Նա նաև շեշտել էր, թե շատ զինծառայողներ Ուկրաինայի քաղաքացիություն են ստանում և որ իբր Ուկրաինայի կառավարությունը որոշում է կայացրել քաղաքացիություն տալ այն վրաստանցիներին, ովքեր կծառայեն ուկրաինական բանակում։
Վրաստանի ՊՆ-ն անդրադարձել էր վերոնշյալ հայտարարությանը, շեշտելով, որ դեռ չի գրանցվել այնպիսի դեպք, երբ զինված ուժերից զինծառայողներ գնան Ուկրաինա, թեև տեղեկություններ ունեն, որ այնտեղ կան Վրաստանի քաղաքացիներ, ովքեր այժմ չեն ծառայում։