Նոր մանրամասներ Ադրբեջանում տեղի ունեցած ավտովթարի վերաբերյալ

Երեկ Ռազմինֆոն անդրադարձել է սեպտեմբերի լույս 18-ի գիշերը Ադրբեջանում տեղի ունեցած ավտովթարին, որի հետևանքով զինծառայողներ են վիրավորվել:
Այսօր հայտնի է դարձել վթարի հետևանքով տուժած զինծառայողների ինքնությունը: Ադրբեջանական APA գործակալությունը, վկայակոչելով Յասմալի ոստիկանական վարչության ներկայացուցչի խոսքերը, գրում է, որ վթարի հետևանքով ութ զինվորական է տուժել, այդ թվում մեկ սպա: Վերջինս N զորամասի բժշկական ծառայության պետ մայոր Հադիր Իսաևն է:
Տուժած զինծառայողներն են Էմիլ Թագիևը, Ֆահրադին Շիհիևը, Հալիլ Ռզաևը, Հուսեին Հասանովը, Ջոշհուն Ռամազանովը, Ինտիզար Ռաջաբովը, և Քյանան Աբդուլազադեն:
Հիշեցնենք, որ վթարը տեղի է ունեցել Բաքվի Շավահատ Մեհդիևի փողոցում «ՈՒԱԶ» և «Մերսեդես» մակնիշի ավտոմեքենաների բախման հետևանքով:
Հաղորդվում է, որ «Մերսեդեսի» վարորդը խախտել է երթևեկության կանոնները, ինչի պատճառով էլ գրանցվել է պատահարը: