ՆԱՏՕ-ն մտադիր է կրճատել համագործակցությունը Աֆղանստանի ուժային կառույցների հետ

Աֆղանական ոստիկանության և զինծառայողների գործողությունների հետևանքով Աֆղանստանում արտասահմանցի զինվորականների մահվան դեպքերի աճով պայմանավորված՝ ՆԱՏՕ-ի հրամանատարությունը Աֆղանստանի ուժային կառույցների հետ համագործակցությունը կրճատելու որոշում է կայացրել: Այդ մասին հայտնում է ՌԻԱ Նովոստին՝ վկայակոչելով Ֆրանս Պրես գործակալության տարարծած տեղեկությունները:
Մասնավորապես նախատեսված է խիստ կրճատել աֆղանական անվտանգության ուժերի պատրաստման, ինչպես նաև պարեկային համատեղ միջոցառումները:
Նշենք, որ կիրակի աֆղանական ոստիկանության համազգեստներ հագած անհայտ անձինք թափանցել են Աֆղանստանի հարավային Գելմենդ նահանգի «Քեմփ Բաստիոն» ռազմաբազա և չորս մարդու սպանել:
Տարվա սկզբից Աֆղանստանում տեղի ոստիկանների և զինծառայողների կողմից արդեն 50 արտասահմանցի զինվորական է սպանվել:
Հավելենք, որ խաղաղարար գործողություններն Աֆղանստանում իրականացվում են կոալիցիոն հակաահաբեկչական և Միջազգային անվտանգության աջակցման ուժերի ջանքերով:
Միջազգային անվտանգության աջակցման ուժերի տվյալներով՝ 2012 թվականի սկզբից Աֆղանստանում միջազգային կոալիցիոն ուժերի 330 մարդ է սպանվել:
Միջազգային ուժերի դուրսբերումը Աֆղանստանից նախատեսված է 2014 թվականի վերջին: