Մարտի 28-ին թուրքական պետական «Անադոլու» գործակալությունը տվյալներ է հրապարակել 2015-ի հուլիսից Թուրքիայի արևելքում քրդերի հետ զինված բախումներում երկու կողմերի և խաղաղ բնակիչների զոհերի մասին։ Հրապարակման համաձայն՝ սպանվել է 355 թուրքական ուժային, 3583 քուրդ զինյալ, 285 խաղաղ բնակիչ: Այս մասին նշվում է «Անադոլուի» հաղորդագրությունում:
Դիարբեքիրի Սուր գավառը թուրք-քրդական բախումների արդյունքում. 28.01.2016 թ.
Նշվում է, որ 2015-ի հուլիսի 7-ից 2016-ի մարտի 7-ն ընկած 265 օրվա ընթացքում «Քրդստանի աշխատավորական կուսակցության» (PKK) հետ մարտերում սպանվել է 215 զինծառայող, 133 ոստիկան, 7 «գյուղական պահապան»»:
Ռազմական բախումների հետևանքով սպանվել է 285, վիրավորվել` 897 խաղաղ բնակիչ, այդ թվում նաև օտարերկրյա քաղաքացիներ: PKK-ի շրջանում զոհերի թիվը հասնում է 3583-ի, վիրավորներինը` 601-ի:
Մինչ այս՝ 2015-ի հոկտեմբերին, «Անադոլուն» հայտնել էր, որ Թուրքիայի ուժային ծառայությունների և PKK բախումներում հուլիսի 7-ից մինչև հոկտեմբերի 6-ը սպանվել է 141 ուժային, 37 քաղաքացիական անձ, վիրավորվել` 483 ուժային և քաղաքացիական:
Միայն Թուրքիայի սահմաններում բախումներում հուլիսի 22-ից սկսած PKK-ն տվել էր 204 զոհ, 128 զինյալ գերի է ընկել: Թուրքիայում և Իրաքում քրդերի դիրքերին հասցված ավիահարվածների և բախումների հետևանքով ընդհանուր առմամբ սպանվել է 1707 քուրդ զինյալ:
Այսինքն, PKK-ի նշված զոհերի միայն փոքրագույն մասն են եղել անմիջապես թուրքական ուժայինների հետ զինված բախումներում ընդգրկված զինյալներ: Մնացածները զոհվել են թուրքական ուժայինների ավիահարվածների, հրետակոծությունների, արկակոծությունների հետևանքով:
Վերջիններիս ամբողջությամբ «զինյալ» որակելու համար բավարար փաստեր, ապացույցներ չկան: Որոշ աղբյուրներ բազմիցս հայտնել են, որ թուրքական պաշտոնական տվյալներում իբրև «ահաբեկիչ» ներկայացվող զոհերի մի մասը խաղաղ քուրդ բնակիչներ են եղել:
Նշենք, որ թուրքական «Մարդու իրավունքների պաշտպանության հիմնադրամ» հասարակական կազմակերպության` 2016թ․ հունվարի 9-ին հրապարակված զեկույցում նշվում էր, որ միայն 2015-ի դեկտեմբերից 11-ից մինչև 2016-ի հունվարի 8-ը Թուրքիայի արևելքում ուժայինները սպանել են 79 քաղաքացիական անձ, որոնցից 14-ն անչափահասներ են։
Նույն աղբյուրը 2016-ի մարտի 22-ին հայտնել է, որ 2015-ի օգոստոսի օգոստոսի 16-ից 2016-ի մարտի 18-ը Դիարբեքիր քաղաքի կենտրոնական Սուր վարչական շրջանում, Ջիզրեում, Սիլոփիում, Իդիլում և Դարգեչիդում սպանվել է առնվազն 310 քաղաքացիական: Նշված զեկույցը չի ներառում հուլիսի 7-ից մինչև օգոստոսի 16-ն ընկած ժամանակահատվածի քաղաքացիական զոհերի, ինչպես նաև նշված վայրերից դուրս, սակայն ռազմական բախումների վայր հանդիսացող շրջաններում զոհերի մասին տվյալներ:
Բացի այդ, տեղեկություններ չեն հրապարակվում նաև Իրաքի տարածքում քուրդ բնակչության զոհերի մասին՝ չնայած որ թուրքական օդուժի գործողությունների հետևանքով սպանվածները ներառված են «Անադոլուի» ցուցակում` իբրև PKK-ի «ահաբեկիչներ»
Թուրքական ուժայինների շրջանում 355 զոհերի մասին տեղեկությունը ևս կարող է չամփոփել ամբողջական պատկերը:
Թուրքիայի արևելքում 2015-ի հուլիսին սկսած զինված բախումների ընթացքին կարող եք ծանոթանալ այս հղումով:
Թուրքական ուժայինները Դիարբեքիրի Սուր գավառում. 28.01.2016 թ.
Թուրքիայի Դիարբեքիր նահանգի Սուր գավառը թուրքա-քրդական բախումների արդյունքում. 24.01.2016 թ.
Թուրքական ուժայինները երկրի հարավարևելյան Դիարբեքիր նահանգի Սուր գավառում
Մարտի 27-ին PKK-ի զինյալները թուրքական ժանդարմերիայի զրահամեքենա են պայթեցրել Նուսայբինում, սպանվել են ուժայիններ
Թուրքիայի հարավարևելյան Մարդին նահանգի Նուսայբին քաղաքը թուրքական ուժայինների ռազմական գործողությունների հետևանքով. 27.03.2016թ.
Թուրքական ուժայինները Շրնաք նահանգի Ջիզրե գավառում
Թուրքական ուժայինները Ջիզրեում. 09.02.2016թ.