Ռազմաշաբաթ. Տարածաշրջան. 6 – 12 մարտի, 2016

Թուրքիայում մեկնարկել է Ադրբեջանի հետ համատեղ զորավարժությունը • Ադրբեջանում հերթական զորակոչը կանցկացվի ապրիլին • Փետրվարին Ադրբեջանի զինուժը կորցրել է 6 զինծառայող • Թուրքիայի զինուժը զորավարժություններ է արել երկրի արևելքում • Թուրքիան մոտ 5,9 մլդր դոլարի ռազմադրյունաբերական ծրագրեր է հաստատել • Ռուսաստանի ռազմական բյուջեն կկրճատի 5 տոկոսով • Վրաստանյան զրահամեքենաները ցուցադրվել են Սաուդյան Արաբիայում • Վրաստանում ԻՊ-ին հարելու համար ազատազրկվել է 3 հոգի • Տաջիկստանում կանցկացվի Ռուսաստանի հետ համատեղ խոշոր զորավարժություն • Թուրքիայում հետախուզական կենտրոն է հիմնվել ԱՄՆ-ի հետ համատեղ • ԱՄՆ-ն հերքել է Սիրիայում բազա հիմնելու մասին տեղեկությունը

TURAZ Şahini 2016 զորավարժությանը մասնակից թուրքական և ադրբեջանական ստորաբաժանումներ

TURAZ Şahini 2016 զորավարժությանը մասնակից թուրքական և ադրբեջանական ստորաբաժանումներ

• Մարտի 7-ին Թուրքիայում մեկնարկել է թուրք-ադրբեջանական ռազմաօդային ուժերի TURAZ Şahini 2016 համատեղ զորավարժությունը, որը տևելու է մինչև մարտի 25-ը։

• Մարտի 7-ին Ադրբեջանի նախագահը ստորագրել է ապրիլի 1-ից 30-ը երկրի քաղաքացիների պարտադիր զինվորական ծառայության զորակոչվելու և ժամկետային զինծառայությունն ավարտած զինծառայողներին պահեստազոր զորացրելու մասին հրամանագիրը:

• Ռազմինֆոյին հայտնի դարձած տվյալներով՝ 2016թ. փետրվարին Ադրբեջանի պաշտպանական և անվտանգության համակարգերում արձանագրել է մահվան 6 և վիրավորման 3 դեպք։ Նրանցից երեքը մարտական կորուստներ են, մեկը՝ հիվանդությունից, մեկը մահացել է դժբախտ պատահարի պատճառով, ևս մեկը՝ ծառայակցի կրակոցից:

• Մարտի 7-ին հայտնի է դարձել Թուրքիայի զինված ուժերի՝ երկրի արևելքում, այդ թվում և Հայաստանին սահմանակից Աղրը նահանգում, անցկացրած 4 զորավարժության մասին:

• Թուրքիայի պաշտպանական արդյունաբերության կոմիտեի՝ 2016-ի մարտի 9-ի նիստում հաստատվել են շուրջ 5,9 մլրդ ԱՄՆ դոլար արժողությամբ նոր ռազմարդյունաբերական նախագծեր, որոնցից 4,5 մլրդ դոլարի ծրագրերն իրականացնելու են Թուրքիայի ռազմարդյունաբերական ընկերությունները:

• Մարտի 5-ին ՌԴ պաշտպանության նախարարի տեղակալը հայտարարել է, որ երկրի պաշտպանական բյուջեն կրճատվելու է 5 տոկոսով։ Հիմնական կրճատումները կատարվելու են շինարարությունների և նյութատեխնիկական ապահովման ծախսերի հաշվին:

• Մարտի 6-ին հրապարակվել է Սաուդյան Արաբիայում անցկացված զորահանդեսից լուսանկար, որտեղ ցուցադրված են նաև վրաստանյան «Դիդգորի» բժշկական տարհանման զրահամեքենաները, որոնք արաբները գնել էին ավելի վաղ։

«Դիդգորի» բժշկական տարհանման զրահամեքենաները Սաուդյան Արաբիայում

«Դիդգորի» բժշկական տարհանման զրահամեքենաները Սաուդյան Արաբիայում

• 2015 թ. հունիսին Վրաստանում ձերբակալված սալաֆիական իմամին դատարանը դատապարտել է 14 տարվա ազատազրկման՝ «Իսլամական պետություն» ահաբեկչական կազմակերպությանը հարելու համար։ Եվս 3 հոգի նույն մեղադրանքով ազատազրկվել են 11, 10 և 1-ական տարի ժամկետով։

• Մարտի 15–19-ին Տաջիկստանում անցկացվելու են Ռուսաստան–Տաջիկստան համատեղ վարժանքներ, որոնց ներգրավվելու են Տաջիկստանի ԶՈւ շուրջ 50 հազար զինծառայող և պահեստազորային, ՌԴ ԶՈւ ավելի քան 2 հազար զինծառայող, ինչպես նաև Ղրղզստանի ռուսաստանյան ավիաբազայի գրոհիչները։

• Մարտի 6-ին հայտնի է դարձել, որ ԱՄՆ Կենտրոնական հետախուզական վարչությունը և Թուրքիայի Ազգային հետախուզական ծառայությունը Թուրքիայում հիմնել են հետախուզական կենտրոն, որի հիմնական նպատակը Մերձավոր Արևելքի երկրներից արտագաղթողների շարքում ահաբեկիչների շարժը կանխարգելելն է:

• Մարտի 6-ին քրդական աղբյուրը հայտնել է, թե ԱՄՆ-ն գրեթե ավարտել է Սիրիայի հյուսիսային` Իրաքին սահմանակից Հասաքա նահանգում ուղղաթիռների և բեռնատար ինքնաթիռների տեղակայման համար նախատեսված ավիաբազայի շինարարությունը և սկսել նմանատիպ ավիաբազա կառուցել քրդական ուժերի վերահսկողության տակ գտնվող Քոբանի քաղաքի մոտակայքում` Թուրքիայի հետ սահմանին: Նույն օրը, սակայն, ԱՄՆ ԶՈւ ներկայացուցիչը հերքել է Սիրիայում ամերիկյան ավիաբազաներ հիմնելու, կամ ցանկացած ավիաբազայում վերահսկողության հաստատելու մասին լուրերը:

Տարածաշրջանի նախորդ ռազմաշաբաթն այստեղ։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *