ԱՄՆ Կենտրոնական հետախուզական վարչությունը Թուրքիայի Ազգային հետախուզական ծառայության հետ Թուրքիայում հիմնել են հետախուզական կենտրոն, որի հիմնական նպատակը Մերձավոր Արևելքի երկրներից արտագաղթողների շարքում ահաբեկիչների շարժը կանխարգելելն է: Այս մասին մարտի 6-ին հայտնել է ամերիկյան The Washington Post պարբերականը:
Կենտրոնը տեղակայված է թուրք-սիրիական սահմանի մոտակայքում: Նշվում է, որ ամերիկյան և թուրքական հետախուզական ծառայությունների գործողությունները չեն սահմանափակվում հնարավոր ահաբեկիչների արտահոսքը կախելու գործում համագործակությամբ:
ԿՀՎ-ն Թուրքիայի «Ինջիրլիք» ավիաբազայում հետախուզական ԱԹՍ-ներ է պահում, որոնք օգտագործվում են Սիրիայում տեղեկություններ հավաքելու համար: ԿՀՎ-ի ղեկավարությունը հրաժարվել է մեկնաբանել այս լուրերը:
Հիշեցնենք, որ դեկտեմբերի 2-ին ԱՄՆ պետքարտուղար Ջոն Քերրին հայտարարել էր, որ Թուրքիան պատրաստ է ամբողջությամբ փակել թուրք-սիրիական սահմանը` ահաբեկիչների մուտքը կանխարգելելու համար։
Ներկայումս Սիրիայի և Իրաքի տարածքների հսկայական հատվածը վերահսկող «Իսլամական պետություն» (ԻՊ) ահաբեկչական խմբավորումն իր շարքերը համալրում է մասնավորապես նաև Թուրքիայից Սիրիա անցնող զինյալներով, իսկ բացի դրանից` Թուրքիայի տարածքով ահաբեկիչները ներթափանցում են նաև Եվրոպա: ԻՊ-ն նաև Թուրքիայի տարածքով է արտահանում, ինչպես նաև հենց Թուրքիայում վաճառում Սիրիայից և Իրաքից արդյունահանած նավթը, ինչն այդ կառույցի հիմնական եկամտի աղբյուրներից մեկն է: