Նախորդ տարվա համեմատ Ադրբեջանի 2016թ. պաշտպանական բյուջեն զգալի նվազել է (աղյուսակ)

Ադրբեջանի նախագահի վավերացմամբ՝ փետրվարի 23-ին փոփոխվել և մարտի 2-ին հրապարակվել է երկրի 2016թ. բյուջեի մասին օրենքը:  Վերաբաշխումներ են կատարվել նաև բյուջեի՝ պաշտպանական ծախսերին վերաբերող հատվածներում (աղյուսակը ստորև):

Ռազմական ծախսերը բյուջեի հին ու նոր տարբերակներում

Մասնավորապես՝ 2015թ. դեկտեմբերի 7-ին ընդունված նախագծով երկրի պաշտպանական ծախսերի համար նախատեսվում էր մոտ 1,84 մլրդ ադրբեջանական մանաթ (ընդունման օրվա պաշտոնական փոխարժեքով 1,75 մլրդ ԱՄՆ դոլար): Փոփոխություններից հետո 2016-ի փետրվարի 23-ին ընդունված տարբերակով պաշտպանական բյուջեն հասել է 2,22 մլրդ մանաթի (ընդունման օրվա պաշտոնական փոխարժեքով 1,43 մլրդ դոլար): Փաստորեն դոլարային արտահայտությամբ Ադրբեջանի պաշտպանական բյուջեն կրճատվել է մոտ 18 տոկոսով։

Ինչ վերաբերում է մանաթով հաշվարկին, ապա նոմինալ փոփոխությունը պայմանավորված է պաշտպանական բյուջեի՝ երկու կետերով ծախսերի ավելացմամբ: Այսպես. «Պաշտպանական ոլորտում նյութատեխնիկական ապահովման ամրապնդում» կետով բյուջեն 20 մլն մանաթից հասել է 340,1 մլն մանաթի: Եվս մոտ 71 մլն մանաթ հատկացվել է աշխատավարձերի բարձրացմանը, ինչը բյուջեի՝ 2015թ. դեկտեմբերի տարբերակում ընդհանրապես նախատեսված չէր:

Ու թեև Ադրբեջանի նախագահի՝ հունվարի 19-ի հրամանագրերով զինված ուժերի և այլ ուժային կառույցների ծառայողների աշխատավարձերը բարձրացվել են 10 տոկոսով (վերը նշված 71 մլն մանաթ հատկացնելը), սակայն այդ բարձրացումը կեղծ է, քանի որ բյուջեի երկու տարբերակների միջև ընկած ժամանակահատվածում (07.12.2015-23.02.2016) մանաթի գնողունակությունը դոլարի նկատմամբ նվազել է մոտ 33 տոկոսով:

Ավելին, հունվարի 15-ին ադրբեջանական «Խազար» ընդդիմադիր կենտրոնը հրապարակել էր տվյալներ, ըստ որոնց՝ ադրբեջանցի զինծառայողների աշխատավարձերն 30-50 տոկոսով նվազեցվում են: Դրան հետևեց պաշտոնական հերքումը, ըստ որի՝ փոփոխությունների արդյունքում հաստիքացուցակներում որոշ կրճատումների հաշվին մյուս զինծառայողների աշխատավարձերը բարձրացվելու են:

Սակայն արդեն հունվարի 16-ին հայտնի դարձավ, որ աշխատավարձի նվազում այնուամենայնիվ կար. այսպես, առաջնագծում և պահեստային զորամասերի զինծառայողները ստանում էին կրկնակի դրույքով աշխատավարձեր, իսկ ահա փոփոխություններից հետո պահեստային զորամասերի զինծառայողների աշխատավարձերն իջեցվեցին մինչև 1,5 դրույք: Այն զինծառայողներին, որոնք ուզում էին կրկնակի դրույքով աշխատավարձ, առաջարկվում էր ծառայության անցնել առաջապահ զորամասերում:

2015թ. բյուջեի հետ համեմատությունը

2015թ. պաշտպանական բյուջեի (մոտ 1,78 մլրդ մանաթ) համեմատ 2016թ. պաշտպանական բյուջեն աճել է 450 մլն մանաթով: Սակայն եթե հաշվի առնվի մանաթի արժեզրկումը, ապա դոլարային արտահայտությամբ կստացվի, որ 2015-ի պաշտպանական բյուջեն, դրա ընդունման օրվա պաշտոնական փոխարժեքով, եղել է 2,26 մլրդ դոլար, իսկ 2016-ի բյուջեն ընդունման օրվա պաշտոնական փոխարժեքով 1,43 մլրդ դոլար է: (2014-ի դեկտեմբերի 24-ին՝ 2015-ի բյուջեն հաստատելիս ադրբեջանական 1 մանաթը պաշտոնապես արժեցել է 1,27 դոլար, իսկ 2016 փետրվարի 23-ին՝ 2016-ի բյուջեն փոփոխելիս, 1 մանաթն արժեցել է 0,64 դոլար):

Կստացվի, որ դոլարային արտահայտությամբ Ադրբեջանի պաշտպանական բյուջեն նախորդ տարվա համեմատ 40 տոկոսով նվազել է: Այս նվազումը մասամբ մեղմվում է այն հանգամանքով, որ բյուջեի ոչ բոլորն ծախսերն են դոլարով արվում:

Ադրբեջանի պաշտպանական բյուջեի բաշխումը և 2015-2016 թվականների բյուջեների համեմատությունը ներկայացնում ենք աղյուսակով (թվերը ներկայացված են մանաթով).

Ոլորտը 2016 (ընդունված 23․02․2016) 2016 (ընդունված 07.12.2015) 2015 (ընդունված 24․12․2014)
1. Պաշտպանություն 2 228 834 663 1 837 821 237 1 778 529 044
1. 1. Պաշտպանության ուժեր 2 114 496 387 1 723 482 961 1 651 220 836
1. 1. 1. Պաշտպանության նախարարություն 1 463 003 900 1 463 003 900 1 255 185 738
1. 1. 2. Պետական սահմանապահ ծառայություն 210 919 132 210 919 132 157 645 847
1. 1. 3. Զորահավաքի և զորակոչի պետական ծառայություն 20 159 929 20 159 929 22 473 696
1. 1. 4. Պետության պաշտպանական պոտենցիալի ամրապնդում 152 014 055
1. 1. 5. Պաշտպանական ոլորտում նյութատեխնիկական ապահովման ամրապնդում 340 100 000 20 000 000 20 000 000
1. 1. 6. Պաշտպանական ոլորտում պետբյուջեից ֆինանսավորվող կառույցների արտաբյուջետային ծախսեր 9 400 000 9 400 000 11 280 000
1. 1. 7. Պաշտպանական ոլորտում աշխատավարձային համակարգի կատարելագործում և այլ սոցիալական միջոցառումներ 70 913 426 32 621 500
1. 2. Ազգային անվտանգություն 108 894 688 108 894 688 121 089 332
1. 2. 1. Պետական անվտանգության ծառայության և Արտաքին հետախուզական ծառայության գործունեության ֆինանսավորում 108 894 688 108 894 688 121 089 332
1. 3. Պաշտականական և անվտանգության ոլորտներում կիրառական հետազոտություներ 2 422 012 2 422 012 2 831 126
1. 3. 1. Պաշտպանական արդյունաբերության նախարարություն 2 422 012 2 422 012 2 831 126
1. 4. Այլ կատեգորիաների մեջ չմտնող ծախսեր 3 021 576 3 021 576 3 387 750
1. 4. 1. Պաշտպանական արդյունաբերության նախարարություն 3 021 576 3 021 576 3 387 750

2 responses to “Նախորդ տարվա համեմատ Ադրբեջանի 2016թ. պաշտպանական բյուջեն զգալի նվազել է (աղյուսակ)

  1. Pingback: Ռուսաստանի պաշտպանական բյուջեն կրճատվելու է 5%-ով | Ռազմ.info

  2. Pingback: Ադրբեջանի ռազմական բյուջեն կարող է շուրջ 27 տոկոսով նվազել | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *