Հայաստանն ու Չեխիան կհամագործակցեն ռազմատեխնիկական ոլորտում • Ուսումնական տագնապ է հայտարարվել ՀՀ ՊՆ-ում • ՊԲ շտաբում անցկացվել են մարտավարաշարային պարապմունքներ • Հայաստանցի զինծառայողները վերապատրաստվում են Վրաստանում • Մոնթեականները հաղթել են միջազգային մրցույթում • Սեյրան Օհանյանն այցելել է Երևանի մաթեմատիկական մեքենաների գիտահետազոտական ինստիտուտ • ՀՀ ՔԿ զինվորական քննչական գլխավոր վարչությունում ամփոփվել են 2015թ. աշխատանքները • Սեյրան Օհանյանն ընդունել է Երևանում ԵԱՀԿ գրասենյակի ղեկավարին • Մեկնարկել են ՌԴ ԶՈւ 102-րդ ռազմաբազայի տանկիստների վարժանքները
Մոնթե Մելքոնյանի անվան ռազմամարզական վարժարանի սանը «Պատանի հայրենասերներ» 12-րդ միջազգային մրցույթ-հավաքին (արխիվ)
• Փետրվարի 25-ին ՀՀ կառավարությունը հավանություն է տվել Հայաստան-Չեխիա ռազմատեխնիկական համագործակցության համաձայնագիր կնքելուն: Համաձայնագրով նախատեսվում է համագործակցություն ռազմական նշանակության արտադրանքի մատակարարման, նորոգման, արդիականացման, տեխնիկական սպասարկման, կադրերի պատրաստման և այլ ոլորտներում:
• ՀՀ ԶՈւ ձմեռային ուսումնական փուլի մեկնարկի շրջանակում փետրվարի 26-ին ՀՀ ՊՆ վարչական համալիրում հայտարարվել է ուսումնական տագնապ և ՊՆ կենտրոնական ապարատի անձնակազմը բերվել է մարտական պատրաստականության բարձր աստիճանի: Վարժանքի նպատակն է եղել ստուգել զինծառայողների և քաղծառայողների մարտական և զորահավաքային պատրաստականության աստիճանը։
Ուսումնական տագնապի ազդանշանով զինծառայողներն ու քաղծառայողները համապատասխան հանդերձանքով ներկայացել են ՀՀ ՊՆ վարչական համալիր
• Փետրվարի 22-ին Պաշտպանության բանակում քննարկվել են նոր ուսումնական փուլի մեկնարկի արդյունքները։ Այնուհետ՝ փետրվարի 22-23-ին, ՊԲ շտաբի վարչության անձնակազմի ներգրավմամբ անցկացվել են մարտավարաշարային պարապմունքներ, որոնց ժամանակ իրենց առջև դրված խնդիրների և դրանցից բխող հավանական զարգացումների վերաբերյալ զեկուցել են բանակի հրամանատարի տեղակալները, մարտական ապահովման բաժինների և ծառայությունների պետերը։
• Փետրվարի 23-ին Վրաստանի Սաչխերեի լեռնային պատրաստության դպրոցում մեկնարկել է ձմեռային հիմնական վերապատրաստման փուլը, որին մասնակցում են նաև Հայաստանի ԶՈւ զինծառայողներ։
• ՀՀ ՊՆ Մոնթե Մելքոնյանի անվան ռազմամարզական վարժարանի սաների թիմը փետրվարի 12-21-ին Ռուսաստանում անցկացված «Պատանի հայրենասերներ» հավաքին տարբեր պետությունների 42 թիմերի շարքում զբաղեցրել է առաջին տեղը: Վարժարանի սաներին փետրվարի 25-ին ընդունել և պարգևատրել է ՀՀ պաշտպանության նախարարը։
ՀՀ պաշտպանության նախարարն ընդունել է ՀՀ ՊՆ Մոնթե Մելքոնյանի անվան ռազմամարզական վարժարանի սաներին
• Փետրվարի 23-ին ՀՀ պաշտպանության նախարարն այցելել է Երևանի մաթեմատիկական մեքենաների գիտահետազոտական ինստիտուտ, ծանոթացել է կատարված շինարարական աշխատանքներին և հորդորել ամրապնդել ռազմարդյունաբերական պետական կոմիտեի, ձեռնարկությունների և տնտեսության այլ ճյուղերի կապը:
• Փետրվարի 26-ին ՀՀ քննչական կոմիտեի զինվորական քննչական գլխավոր վարչությունում ամփոփվել են 2015թ. աշխատանքները։ Արձանագրվել է, որ 2015թ․ ընթացքում ՀՀ ՔԿ ԶՔԳՎ վարույթում քննվել է 4633 քրեական գործ։ ՀՀ ՔԿ նախագահը ԶՔԳՎ-ին հանձնարարել է պարբերաբար վերլուծել զինված ուժերում հանցավորությանը նպաստող պայմանները և եռամսյակը մեկ հաղորդում ուղարկել ՀՀ պաշտպանության նախարարին։
• Փետրվարի 22-ին ՀՀ պաշտպանության նախարար Սեյրան Օհանյանն ընդունել է Երևանում ԵԱՀԿ գրասենյակի ղեկավար, դեսպան Անդրեյ Սորոկինին` Հայաստանում աշխատանքային գործունեության ավարտի կապակցությամբ:
• Ռուսաստանի ԶՈւ՝ Հայաստանում տեղակայված ռազմաբազայի տանկային ստորաբաժանումները սկսել են «տանկային դուելներով» պարապմունքները: