Փետրվարի 19-ին ՀՀ ՊՆ վարչական համալիրում անցկացվել է խորհրդակցություն՝ նվիրված զինված ուժերի անձնակազմի համալրման գործընթացին: Խորհրդակցության ընթացքում քննարկվել են զինված ուժերը ժամկետային ու պայմանագրային զինծառայողներով, սպաներով ու ենթասպաներով համալրելու աշխատանքները: Այս մասին տեղեկացնում է ՀՀ ՊՆ կայքը:
ՀՀ ԶՈւ համալրման հարցերի վերաբերյալ քննարկում ՀՀ պաշտպանության նախարարությունում
Իր խոսքում պաշտպանության նախարար Սեյրան Օհանյանը ռազմաքաղաքական առկա իրավիճակի պայմաններում կարևորել է խառը սկզբունքով զինված ուժերի համալրման և մասնավորապես պրոֆեսիոնալ կազմի ներկայությունն ընդլայնելու գործընթացի շարունակականությունը, ինչպես նաև այդ ուղղությամբ նոր, առավել թիրախային ու արդյունավետ ծրագրերի մշակումը՝ զինված ուժերի առջև դրված խնդիրները պատշաճ մակարդակով կատարելու համար:
Քննարկման ընթացքում զինված ուժերը պայմանագրային կազմով համալրելու, ՀՀ ՊՆ ռազմաուսումնական և ՀՀ բարձրագույն ուսումնական հաստատություններում և արտերկրում ռազմական կադրերի, զորամասերում կրտսեր հրամանատարների և մասնագետների պատրաստման ընթացքի, կազմակերպչական հաստիքային աշխատանքների, դրանց հետ կապված խնդիրների և առաջարկվող լուծումների վերաբերյալ զեկույցներ և պարզաբանումներ են ներկայացրել ՊՆ, ԶՈւ, ԶՈւ ԳՇ համապատասխան ստորաբաժանումների ղեկավարները:
Ծավալուն անդրադարձ է կատարվել զինվորական ծառայության գրավչության ապահովման արդի տարրերին, պայմանագրային զինծառայողների պատրաստման և ուսուցման, նրանց աշխատավարձերի բարձրացման և սոցիալական նոր երաշխիքների ապահովման հարցերին, որոնց կապակցությամբ Սեյրան Օհանյանը ներկայացրել է իր նկատառումները:
ՀՀ ԶՈւ համալրման վերաբերյալ քննարկմանը մասնակցել են նաև ՀՀ ՊՆ ռազմաուսումնական հաստատությունների պետերը