Քրդական ANF News լրատվական գործակալությունը փոխանցում է, որ PKK-ի YPS կառույցի մարտիկիները փետրվարի 3-4-ի թուրք-քրդական բախումներում սպանել են 9 թուրքական ուժային: Նույն կառույցը օրերս հայտնել էր, որ 2016-ի հունվարին իրենք ընդհանուր առմամբ սպանել են 98 թուրքական ուժայինների:
Նույն աղբյուրը փետրվարի 4-ին փոխանցում է, որ Դիարբեքիրի Սուր և Շրնաքի Ջիզրե գավառներում շարունակվում են բախումները, թուրքական ուժայինները հրետանային կրակի տակ են պահում բնակավայարերը:
Քրդական գործակալությունը նաև հայտնում է, որ թուրքական օդուժը շարունակում է ռմբակոծել Իրաքի տարածքում քրդական բնակավայրերը: Ինչպես նաև նշում է, որ թուրքական ուժայինները ռազմական գործողություններ են սկսել նաև Հաքքարի նահանգի Շեմդինլի գավառում:
Թուրքիայի ԶՈւ ԳՇ կայքը հայտնել է փետրվարի 4-ին Սուր գավառում սպանված 1 հատուկջոկատայինի մասին: Իսկ երեկ հայտնի էր դարձել Շրնաք նահանգի Ջիզրե քաղաքում սպանված ևս մեկ հատուկջոկատայինի մասին:
Այսօր` փետրվարի 5-ին, Թուրքիայի ԶՈւ ԳՇ կայքը հայտնել է, որ 2015-ի դեկտեմբերից մինչև 2016-ի փետրվարի 4-ը Ջիզրե գավառում սպանվել է PKK-ի 540, իսկ Սուր գավառում` 161 զինյալ:
Թուրքական պետական «Անադոլու» լրատվական գործակալությունն իր հերթին փետրվարի 5-ին հայտնում է, որ Թուրքիայի ռազմաօդային ուժերը F-16 և F-4E 2020 կործանիչներով ռմբակոծել են Իրաքի տարածքում PKK-ի Քանդիլ բազան:
Ավելացնենք, որ այսօր` փետրվարի 5-ին, Թուրքիայի հարավարևելյան քրդաբնակ Մարդին քաղաք այցի ընթացքում Թուրքիայի վարչապետը 10 կետից բաղկացած նոր ծրագրում անդրադարձել է քրդական PKK-ի դեմ պայքարի նոր մեխանիզմներին:
Սակայն այդ տասը կետերի մեծ մասը պարունակում են միայն հուզական և գրեթե ոչինչ չասող արտահայտություններ Թուրքիայում խաղաղություն հիմնելու և ահաբեկչական կառույցների դեմ պայքարի մասին ցանկությունների վերաբերյալ:
Թերևս ուշադրություն է գրավում այն հանգամանքը, որ Դավութօղլուն ահաբեկչության դեմ պայքարը կապում է նոր սահմանադրության ընդունման հետ` 1982-ին ընդունված սահմանադրությունը համարելով ահաբեկչության դեմ պայքարում մեխանիզմներից զուրկ:
Ըստ էության՝ Դավութօղլուն այս հանգամանքը փորձում է օգտագործել բազմաթիվ հակասությունների տեղիք տված նոր` նախագահական իշխանությունն ընդգծող սահմանադրության ընդունման անհրաժեշտությունը հիմնավորելու համար:
Ավելացնենք նաև, որ օրերս Դավութօղլուն հայտարարել էր PKK-ի առաջնորդ և 1999-ից Իմրալը կղզում բանտարկված Աբդուլլահ Օջալանի հետ բանակցությունները դադարեցնելու մասին` նշելով, որ դա օգուտ չի տալիս PKK-ի դեմ պայքարին: Մինչ այս թուրքական կառավարությունը փորձում էր Օջալանին օգտագործել PKK-ի դեմ պայքարում որպես գործիք:
Թուրքիայի արևելքում 2015-ի հուլիսին սկսած զինված բախումների ընթացքին կարող եք ծանոթանալ այս հղումով: