Թուրքիայի արևելքում շարունակվում են ուժայինների և «Քրդստանի աշխատավորական կուսակցության» (PKK) զինված բախումները: Առավել լարված իրավիճակ է Դիարբեքիր նահանգի Սուր գավառում: Սուր քաղաքում շարունակվող մարտերի պատճառով այսօր` փետրվարի 3-ին, ևս 4 թաղամասերում «փողոց դուրս գալու» արգելք է սահմանվել: Այս մասին հայտնում է թուրքական պետական «Անադոլու» լրատվական գործակալությունը:
Դիարբեքիրի Սուր գավառը թուրք-քրդական բախումների արդյունքում. 28.01.2016 թ.
Նշվում է, որ PKK-ի գրոհայինները շարունակում են բարիկադներ կառուցել քաղաքի տարբեր թաղամասերում, ինչի պատճառով թուրքական ուժայինները չեն կարող ապահովել քաղաքացիների անվտանգությունը մարտերի ժամանակ` այդ իսկ պատճառով էլ 4 թաղամասերում ևս «փողոց դուրս գալու արգելք» է սահմանվել:
Սա, ըստ էության, նշանակում է, որ փողոց դուրս եկած ցանկացած բնակիչ կարող է դառնալ թուրքական ուժայինների թիրախը` ընդունվելով որպես ահաբեկիչ: Այսինքն, Սուր քաղաքի բնակիչները վերջնականապես զրկվում են ազատ շարժի, առաջնային կարիքները հոգալու հնարավորությունից:
Հիշեցնենք, որ Սուր քաղաքի 11 թաղամասերում «փողոց դուրս գգալու արգելք» սահմանվել էր 2015-ի դեկտեմբերի 2-ից սկսած, ինչից հետո թուրքական ոստիկանության, ժանդարմեիրիայի և ԶՈւ ԳՇ հատուկ նշանակության ստորաբաժանումները մարտական գործողություններ են վարում քաղաքում: Այսօրվանից սկսած «փողոց դուրս գալու արգելք» է սահմանվել փաստորեն քաղաքի բոլոր 15 թաղամասերում, ինչը խոսում է մարտերի ուժգնանալու մասին:
Թուրքական ուժայինները Դիարբեքիրի Սուր գավառում. 28.01.2016 թ.
Հիշեցնենք, որ երեկ` փետրվարի 2-ին, Թուրքիայի ներքին գործերի նախարարը հայտարարել էր, որ մոտ օրերս Ջիզրեում կդադարեն բախումները, իսկ առաջիկա երկու շաբաթվա ընթացքում էլ Սուր գավառում կդադարեն մարտերը և PKK-ի գրոհայինները պարտություն կկրեն: Սակայն, ինչպես տեսնում ենք, մարտերը նոր թափով են շարունակվում:
Այսօր նաև հայտնի է դարձել, որ մահացել է Սուր քաղաքում շարունակվող մարտերում օրերս վիրավորված մեկ հատուկջոկատային:
«Անադոլու»-ն նաև այսօր հայտնել է, որ PKK-ի զինյալները նռանականետերով կրակել են Դիարբեքիրի ոստիկանական բաժանմունքի վրա: Միջադեպի հետևանքով տուժողներ չեն եղել:
Քրդական աղբյուրների արձագանքը
Նշենք, որ եթե թուրքական պաշտոնական աղբյուրները հայտնում են իրենց կողմից միայն ահաբեկիչների սպանության մասին, ապա քրդական աղբյուրների փոխանցմամբ` թուրքական ուժայինները սպանում են նաև զինված պայքարի հետ կապ չունեցող խաղաղ քուրդ բնակիչների:
Քրդական ANF News լրատվական գործակալությունը հայտնում է, որ թուրքական ուժայինները փետրվարի 3-ին ձերբակալել են Հաքքարի նահանգի Յուքսեքովա գավառի կառավարչին` ավելացնելով, որ Յուքսեքովայի մի շարք թաղամասերում ևս բախումները շարունակվում են:
Նույն աղբյուրը նշում է, որ այլևս չեն կարողանում տեղեկություն ստանալ արդեն 12 օր հրազենային վնասվածքներով Ջիզրե քաղաքի Ջուդի թաղամասի տներից մեկում գտնվող մարդկանց մասին, որոնցից 8-ը արդեն զոհվել էին այս ընթացքում: Աղբյուրը մինչ այս էլ հայտնել էր, որ թուրքական ուժայիները չեն թույլատրում վիրավորներին հիվանդանոց տեղափոխել:
Թուրքական ուժայինները Շրնաք նահանգի Ջիզրե գավառում
Թուրքիայի արևելյան քրդաբնակ շրջաններում շարունակվող բախումներից դժգոհում են նաև թուրքական մի շարք հասարակական կազմակերպություններ, Թուրքիայի արևմտյան շրջաններում անցկացվում են բողոքի ցույցեր:
Մասնավորապես երեկ` փետրվարի 2-ին, թուրքական «Դողան» լրատվական գործակալության փոխանցմամբ Ստամբուլի Քդըքյոյ թաղամասում հասարակական կազմակերպություններից մեկի կոչով քաղաքացիները բողոքի ցույց են անցկացրել` դժգոհելով Շրնաք նահանգի Ջիզրե գավառում կառավարական ուժերի գործողություններից և պահանջելով դադարեցնել բախումները:
Նշենք, որ զինված բախումներ են ոչ միայն Սուր և Ջիզրե գավառներում: Գրեթե նմանատիպ իրավիճակ է նաև Շրնաքի Սիլոփի գավառում, Մարդին, Հաքքարի նահանգներում, ինչպես նաև Թուրքիայի քրդաբնակ արևելյան այլ գավառներում: Սակայն քրդական ուժերը առավելագույն դիմադրություն ցուցաբերում են Դիարբեքիր և Շրնաք նահանգներում, մասնավորապես` Սուր և Ջիզրե գավառներում:
Թուրքիայի արևելքում 2015-ի հուլիսին սկսած զինված բախումների ընթացքին կարող եք ծանոթանալ այս հղումով: