Քուրդ զինյալները թուրք 9 ուժային են սպանել

Թուրքիայի հարավ-արևելքում գտնվող Շիրնակ նահանգում՝ Իրաքի և Սիրիայի սահմաններին մոտ, սեպտեմբերի 2-ին թուրք ուժայինների և քուրդ զինյալների միջև տեղի ունեցած բախման հետևանքով 30 մարդ է սպանվել: Սպանվածներից 21-ը քուրդ զինյալներ են, 9-ը՝ Թուրքիայի ուժային կառույցների աշխատակիցներ: Այդ մասին հաղորդում է ռուսական Lenta.ru կայքը:
Բախման հետևանքով նաև թուրք 8 ուժային է վիրավորվել:
Նշենք, որ Թուրքիայի կառավարական ուժերի և Քրդական Բանվորական կուսակցության զինյալների միջև բախումները վերջին ամիսներին առավել սուր բնույթ են ստացել:
Թուրք պաշտոնյաների և վերլուծաբանների կարծիքով՝ դա պայմանավորված է հարևան Սիրիայում ծավալվող դեպքերով:
Եվ դա այն դեպքում, երբ Թուրքիայի վարչապետ Ռեջեփ Թայիփ Էրդողանը օգոստոսի 31-ին հայտարարել էր, թե Թուրքիայում քրդական հարց այլևս չկա. այն լուծվել է թուրքական իշխանությունների կողմից:
Մինչդեռ երկու շաբաթ առաջ քուրդ զինյալները թուրք զինվորականների շարասյուն էին պայթեցրել, ինչի հետևանքով 5 զինվոր էր զոհվել:
Հավելենք, որ Թուրքիայի կառավարական ուժերի և Թուրքիայի հարավ-արևմուտքում սեփական անկախ քրդական պետություն ստեղծել ցանկացող ՔԲԿ զինյալների միջև շուրջ 30 տարի ձգվող բախումների հետևանքով ավելի քան 40 հազար մարդ է զոհվել:
Թուրքիայում, ԱՄՆ-ում և ԵՄ երկրներում ՔԲԿ-ն համարվում է ահաբեկչական խմբավորում: