ՀՀ պաշտպանության նախարարը ներկա է գտնվել Գիտելիքի օրվան նվիրված տոնական միջոցառմանը

ՀՀ պաշտպանության նախարար Սեյրան Օհանյանը սեպտեմբերի 1-ի այցելել է Երևանի Չեխովի անվան թիվ 55 դպրոց և ներկա գտնվել Գիտելիքի և դպրության օրվան նվիրված տոնական միջոցառմանը:
Այցելության շրջանակներում Սեյրան Օհանյանը հանդիպել է դպորցի ուսուցչական անձնակազմի և աշակերտների հետ: Իր խոսքում պաշտպանության նախարարը նշել է, որ ՀՀ բոլոր ուսումնական հաստատությունները ներկայումս կցված են զորամասերին և պաշտպանական գերատեսչությունը նախնական պատրաստության, ռազմահայրենասիրական դաստիարակության, գաղափարական պատրաստության տարաբնույթ միջոցառումներ է անցկացնում դպրոցների և բուհերի հետ: Սեյրան Օհանյանի խոսքերով՝ վերջին տարիներին այդ աշխատանքները ավելի արդյունավետ բնույթ են կրում, քանի որ պարբերաբար կատարելագործվում և ժամանակակից ստանդարտներին է համապասխանեցվում ուսումնանյութական բազան, բացի այդ՝ հետևողական աշխատանք է տարվում նախնական զինվորական պատրաստության ուսուցիչների՝ զինղեկների կարողությունների ու հմտությունների բարձրացման ուղղությամբ: