Ահաբեկչության Աֆղանստանում. զոհվել է 12, վիրավորվել՝ 59 մարդ

Այսօր առավոտյան Աֆղանստանի Վարդակ նահանգում տեղակայված ռազմաբազայից քիչ հեռու միանգամից երկու ահաբեկչություն է տեղի ունեցել, որոնց հետևանքով զոհվել է 12, վիրավորվել՝ 59 մարդ: Այդ մասին հաղորդում է աֆղանական «Պաժվակ» լրատվական գործակալությունը:
Աֆղանստանի Ոստիկանության տվյալներով՝ մահապարտ-ահաբեկիչներից մեկը պայթյունն իրականացրել է Աֆղանստանի Վարդակ նահանգում՝ ՆԱՏՕ-ի և աֆղանական անվտանգության ուժերի կոորդինացիոն-օպերատիվ կենտրոնի դարպասների մոտ: Մյուս ահաբեկիչն այնուհետև միկրոավտոբուսով հարվածել է ռազմաբազայի դարպասներին:
Պայթյունների հետևանքով զոհված 12 անձանցից 4-ը ոստիկանության աշխատակիցներ են, 8-ը՝ խաղաղ բնակիչներ: Բացի այդ՝ վիրավորվել է 47 խաղաղ բնակիչ, 7 ոստիկան, ազգային անվտանգության 3 աշխատակից, ինչպես նաև Աֆղանստանում անվտանգության աջակցման միջազգային ուժերի(ISAF) 2 ծառայող:
Ահաբեկչությունների պատասխանատվությունն իր վրա է վերցրել ծայրահեղական «Թալիբան» շարժումը: