Քրդական նոր կառույցը կհամակարգի Թուրքիայի քրդական զինված խմբերի գործունեությունը

Քրդական PKK-ի «Քաղաքացիականների պաշտպանության ստորաբաժանումներ» (YPS – Yekineyen Parastina Sivil) անվամբ նոր ռազմական կառույցը հայտարարել է, որ ինքն է համակարգելու Թուրքիայի տարածքում քրդական զինված ուժերը: Այս մասին հայտնում է PKK-ին մոտ կանգնած քրդական ANF News լրատվական գործակալությունը, որը նաև հրապարակել է YPS-ի զինյալների հայտարարությունների տեսանյութեր:

Քրդական PKK-ի «Քաղաքացիականների պաշտպանության ստորաբաժանումներ» (YPS)

Քրդական PKK-ի «Քաղաքացիականների պաշտպանության ստորաբաժանումներ» (YPS)

«Քրդստանի աշխատավորական կուսակցության» (PKK) նոր ռազմական կառույցը հայտարարել է, որ արդեն isկ կազմալուծվել է  PKK-ի երիտթև համարվող «Հայրենասիրական հեղափոխական երիտասարդական շարժումը»  (YDG-H) և միացել նոր կառույցին: Կառույցին են միացել նաև Թուրքիայի տարածքում գործող քրդական մի շարք այլ զինված կառույցներ:

YPS-ի անդամներից մեկը հայտարարում է, որ իրենք համակարգում են բնակավայրերում թուրքական ուժայինների դեմ քրդական զինված ուժերի պայքարը, և կոչ է արել բոլոր քրդերին միանալ իրենց զինված պայքարին:

Քրդական կառույցի անդամը հայտնել է, որ իրենց գլխավոր նպատակը 2015-ի դեկտեմբերից թուրքական ուժայինների կողմից քրդաբնակ վայրերում սկսված ռազմական գործողություններից քուրդ բնակիչներին պաշտպանելն է:

Հիշեցնենք, որ քրդական նոր կառույցի մասին հայտնի էր դարձել դեռևս 2015-ի դեկտեմբերին: Նշվում էր, որ YPS-ի կազմի մեջ արդեն մտել են YDG-H-ն, PKK-ի «Ինքնապաշտպանության ուժերը», ինչպես նաև գյուղական վայրերում, լեռներում տեղակայված քրդական ուժերը:

Նշենք, որ 2015-ի դեկտեմբերից Թուրքիայի արևելքում ընթացող զինված բախումներից թուրքական կողմից ներգրավված են ոստիկանության, ժանդարմերիայի հատուկջոկատայինները և «գյուղական պահապանները»` ԶՈւ գլխավոր շտաբի համակարգմամբ:

Իսկ հունվարի 19-ին հայտնի դարձավ, որ Թուրքիայի ԶՈւ գլխավոր շտաբի հատուկ նշանակության գործողությունների հրամանատարությունը շուրջ 200-հոգանոց հատուկջոկատայինների («բոսորագույն բերետավորներ») ստորաբաժանում է ուղարկել Դիարբեքիր նահանգի Սուր գավառ: Առավել ուշ նմանատիպ ստորաբաժաում ուղարկվել է նաև Շրնաք նահանգի Ջիզրե գավառ:

Թուրքական ուժայինները երկրի հարավարևելյան Դիարբեքիր նահանգի Սուր գավառում

Թուրքական ուժայինները երկրի հարավարևելյան Դիարբեքիր նահանգի Սուր գավառում

Նշենք, որ 2015-ի դեկտեմբերից բախումները վերսկսելուն հետ մեկտեղ քրդական աղբյուրները շարունակում են հայտարարել, որ թուրքական ուժայինները սպանում են զինված պայքարի հետ որևէ կապ չունեցող խաղաղ բնակիչների` այդ թվում ծերերի, կանանց և երեխաների:

2015-ի դեկտեմբերից մինչ օրս Թուրքիայի արևելքում շարունակվող զինված բախումների ընթացքի ընթացքին, թուրքական և քրդական կողմերի արձագանքներին կարող եք ծանոթանալ հետևյալ հղումով դրված հոդվածներում: