ՀՀ ՊՆ խաղաղապահները մեկնել են Գերմանիա՝ Աֆղանստանում ծառայությունից առաջ վերապատրաստվելու

Հունվարի 16-ին ՀՀ ՊՆ խաղաղապահ բրիգադի հերթական զորախումբը մեկնել է Գերմանիա, որտեղ նախապատրաստական վարժանքներ անցնելուց հետո հայաստանցի խաղաղապահները տեղափոխվելու են Աֆղանստան՝ խաղաղարար առաքելության։ Այս մասին հայտնում է ՀՀ ՊՆ «Զինուժ» հեռուստածրագրի՝ հունվարի 23-ի թողարկումը։

ՀՀ ՊՆ խաղաղապահ բրիգադի հերթական ստորաբաժանումը՝ խաղաղարար առաքելությունից առաջ

ՀՀ ՊՆ խաղաղապահ բրիգադի հերթական ստորաբաժանումը՝ խաղաղարար առաքելությունից առաջ

Ճանապարհման հանդիսավոր արարողության ընթացքում խաղաղապահներին վերջին ցուցումներն է տվել բրիգադի շտաբի պետ, գնդապետ Գևորգյանը։

Փոխգնդապետ Կարեն Բաղյանի հրամանատարությամբ գործող հայ խաղաղապահների նոր հերթափոխը տեղակայվելու է Աֆղանստանի Մազարի Շարիֆ ավանում գործող միջազգային խաղաղապահ ուժերի զինավանում։

Նախքան Աֆղանստանում տեղակայվելը հայաստանցի զինծառայողները Գերմանիայում մասնակցելու են նախապատրաստական երեքշաբաթյա դասընթացներին և վարժանքներին։

Զորախմբի կազմում ընդգրկված վարորդ զինծառայողները Գերմանիա են մեկնել մեկ շաբաթ առաջ՝ նրանց համար անցկացվող լրացուցիչ մեքենավարման դասընթացներին։

Հայաստանցի խաղաղապահները մեկնում են Գերմանիա՝ Աֆղանստանում ծառայություն անցնելուց առաջ վարժանքներ անցկացնելու․ հունվար 2016

Հայաստանցի խաղաղապահները մեկնում են Գերմանիա՝ Աֆղանստանում ծառայություն անցնելուց առաջ վարժանքներ անցկացնելու․ հունվար 2016

Դեկտեմբերին ՆԱՏՕ-ն հայտարարել է, որ Աֆղանստանի ուժայիններին մարզելու «Վճռական աջակցություն» ծրագիրը երկարաձգում է մինչև 2016-ի ավարտը: ՆԱՏՕ-ի ինչպես «Վճռական աջակցություն», այնպես էլ դրան հաջորդելիք «Տևական գործընկերություն» առաքելություններին մինչև վերջ մասնակցելու իր հանձնառությունը Հայաստանը հաստատել է ՀՀ պաշտպանության նախարարի և ՀՀ արտգործնախարարի միջոցով:

Աֆղանստանում ՆԱՏՕ-ի հովանու ներքո իրականացվող առաքելություններին Հայաստանը մասնակցում է 2010 թվականից: Աֆղանստանում հերթափոխով ծառայություն է անցկացնում Հայաստանի զինված ուժերի 131 խաղաղապահ զինծառայող, որոնք խաղաղապահ առաքելությանը մասնակցում են Գերմանիայի զինված ուժերի հրամանատարության ներքո՝ Աֆղանաստանի հյուսիսային հրամանատարության կազմում:

Աֆղանստանի «Վճռական աջակցություն» առաքելությունում Գերմանիայի ԶՈւ հրամանատարությամբ գործող «Հյուսիս» զորախմբի պատասխանատվության գոտին, որտեղ ծառայում են նաև ՀՀ ԶՈւ խաղաղապահ զինծառայողները

Աֆղանստանի «Վճռական աջակցություն» առաքելությունում Գերմանիայի ԶՈւ հրամանատարությամբ գործող «Հյուսիս» զորախմբի պատասխանատվության գոտին, որտեղ ծառայում են նաև ՀՀ ԶՈւ խաղաղապահ զինծառայողները

Աֆղանստանում անցկացվող «Վճռական աջակցություն» առաքելությունը ոչ մարտական է, դրա հիմնական նպատակն է մարզել և վերապատրաստել Աֆղանստանի ուժային կառույցների ներկայացուցիչներին։ 2014թ. ավարտին այն փոխարինել է ISAF առաքելությանը։

Ինչպես և ISAF («Անվտանգության աջակցության միջազգային ուժերի») ծրագրի ժամանակ, Resolute support («Վճռական աջակցություն») ծրագրի շրջանակներում նույնպես Աֆղանստանի ողջ տարածքը բաժանված է 4 հատվածների, որոնցից գերմանական զորախումբը, որի կազմում են ՀՀ ԶՈւ զինծառայողները, հսկում է հյուսիսայինը։

ՀՀ պաշտպանության նախարար Սեյրան Օհանյանի այցը Աֆղանստան՝ այնտեղ ծառայող ՀՀ ԶՈւ խաղաղապահների ծառայությանը ծանոթանալու նպատակով․ 2010թ․ հուլիսի 24

ՀՀ պաշտպանության նախարար Սեյրան Օհանյանի այցը Աֆղանստան՝ այնտեղ ծառայող ՀՀ ԶՈւ խաղաղապահների ծառայությանը ծանոթանալու նպատակով․ 2010թ․

Ավելացնենք, որ Հայաստանը խաղաղապահ առաքելություններին միացել է 2001-ին, իսկ անմիջական մասնակցություն ունի 2004 թվականից: Մինչ օրս հայ խաղաղապահները մասնակցել են չորս առաքելությունների` 2004-ից Կոսովոյում, 2005-ից՝ Իրաքում, 2010-ից՝ Աֆղանստանում, 2014-ից՝ Լիբանանում։ 2015-ից էլ ՀՀ ՊՆ խաղաղապահ բրիգադի մեկ սպա որպես դիտորդ մասնակցում է Մալիում ՄԱԿ հովանու ներքո անցկացվող խաղաղապահ առաքելությանը:

Միջազգային խաղաղապահ գործողություններին մասնակցելու ավելի քան 10-ամյա փորձը Հայաստանին թույլ է տվել ՀԱՊԿ Հավաքական անվտանգության խորհրդի նիստում առաջարկել ստեղծել կազմակերպության խաղաղապահների պատրաստման բազային կազմակերպություն, որի հիմք կարող է լինել ՀՀ ԶՈւ խաղաղապահ ջոկատների պատրաստման կենտրոնը:

3 responses to “ՀՀ ՊՆ խաղաղապահները մեկնել են Գերմանիա՝ Աֆղանստանում ծառայությունից առաջ վերապատրաստվելու

  1. Pingback: Ռազմաշաբաթ. Հայաստան. 24 – 30 հունվարի, 2016 | Ռազմ.info

  2. Pingback: Աֆղանստան մեկնելուց առաջ ՀՀ ԶՈւ խաղաղապահները կվերապատրաստվեն Գերմանիայում | Ռազմ.info

  3. Pingback: ՀՀ ԶՈւ խաղաղապահները մեկնել են Գերմանիա՝ Աֆղանստանում ծառայությանը պատրաստվելու | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *