Գյումրիի ՌԴ ռազմաբազայի տանկիստները պատրաստվում են Տանկային բիաթլոն 2016-ին

Ռուսաստանի զինված ուժերի՝ Հայաստանում տեղակայված 102-րդ ռազմաբազայի տանկիստները և հետևակի մարտական մեքենաների վարորդները բարձրլեռնային «Ալագյազ» զորավարժարանում սկսել են նախապատրաստվել «Միջազգային բանակային խաղեր 2016-ին»: Այս մասին հունվարի 21-ին Ռազմինֆոյին տեղեկացրել է ՌԴ ԶՈւ հարավային ռազմական շրջանի մամուլի ծառայությունը։

2014-ի ՌԴ ԶՈւ համաբանակային տանկային բիաթլոնի ընթացքը։ Տանկերն ու ՀՄՄ-ները նույն շարքում

Մասնավորապես, տանկիստները փորձարկելու են Տ-72Բ տանկերով տարբեր վարժություններ անցկացնելու հմտությունները, իսկ հետևակի մարտական մեքենաների անձնակազմերը պետք է վարժանքներ անցկացնեն ԲՄՊ-2 մեքենաներով:

Մարզումների ընթացքում տանկերի ու ՀՄՄ-ների՝ լավագույնը ճանաչված մեխանիկ-վարորդները, հրամանատարները և նշանառու օպերատորները ռազմաբազան կներկայացնեն ՌԴ ԶՈւ հարավային ռազմական շրջանի մրցումների ժամանակ: Հաղթողները հնարավորություն կստանան մասնակցել 2016-ի ամռանը «Միջազգային բանակային խաղերի» շրջանակներում անցկացվելիք «Տանկային բիաթլոն» և «Սուվորովյան գրոհ» մրցություններին:

Նշվում է, որ 2015-ին անցկացված «Սուվորովյան գրոհ» մրցույթի արդյուքնում հաղթող էր ճանաչվել հենց Գյումրու ռուսաստանյան ռազմաբազան ներկայացնող ԲՄՊ-2-ի անձնակազմը:

Ավելացնենք, որ  անցյալ շաբաթ մեկնարկել էին Ռուսաստանի ԶՈւ՝ Հայաստանում տեղակայված 102-րդ ռազմաբազայի մոտոհրաձիգների, տանկիստների, ինչպես նաև «Էրեբունի» ավիաբազայի ՄիԳ-29 կործանիչների օդաչուների մեկամսյա վարժանքները, իսկ այս շաբաթ մեկնարկել են նաև դիպուկահարների վարժանքները։

ՌԴ ԶՈւ 102-րդ ռազմաբազայի Տ-72Բ տանկը վարժանքների ժամանակ