Թուրքիայի ԳՇ. «Դեկտեմբերի սկզբից Թուրքիայում սպանվել է 305 քուրդ զինյալ»

Հունվարի 6-ին Թուրքիայի ԶՈւ գլխավոր շտաբը հայտնել է, որ 2015 թ. դեկտեմբերի մեկից Թուրքիայի արևելքում «Քրդստանի աշխատավորական կուսակցությունը» (PKK) թուրքական ուժայինների հետ բախումներում տվել է 305 զոհ: ԳՇ կայքում քրդական զոհերը նշված են ըստ նահանգների և գավառների:

Թուրքական ուժայինները Դիարբեքիրի Սուր գավառի կենտրոնում

Մասնավորապես նշվում է, որ 2015 թ. դեկտեմբերից մինչև 2016-ի հունվարի 6-ը Թուրքիայի հարավարևելյան Շրնաք նահանգի Ջիզրե գավառում սպանվել է 207, Սիլոփի գավառում` 36, իսկ Դիրաբեքիր նահանգի Սուր գավառում`62 քուրդ:

Հիշեցնենք, որ դեկտեմբերի 25-ին թուրքական պետական «Անադոլու» լրատվական գործակալությունը հայտնել էր, որ դեկտեմբերյան բախումների հետևանքով Թուրքիայի հարավարևելյան Շրնաք նահանգի Ջիզրե և Սիլոփի, Մարդինի` Նուսայբին և Դարգեչիդ, Դիարբեքիրի Սուր գավառներում և Բիթլիսի Սեհի Օրմանլարը տեղանքում ընդհանուր առմամբ սպանվել էր PKK-ի 205 զինյալ: Ամենաշատ թվով զինյալներ սպանվել էին Շրնաքի Ջիզրե գավառում` 139, և Դիարբեքիրի Սուր գավառում` 33 զինյալ:

Քրդական աղբյուրներն իրենց հերթին հայտնում էին, որ թուրքական ուժայինները սպանում են սովորական քաղաքացիների, որոնք զինված պայքարին ընդհանրապես չեն մասնակցում:

Մասնավորապես քրդական ANF News լրատվական գործակալությունը դեկտեմբերի 25-ին հայտնել էր, որ թուրքական ուժայիններն արդեն 24-րդ օրն է, ինչ տանկերով և ծանր հրազենով կրակում են Սուր գավառի բնակելի շենքերի, ինչպես նաև կրոնական շենքերի վրա:

2015-ի դեկտեմբերին գրանցված բախումներին, ինչպես նաև թուրքական և քրդական կողմերի արձագանքներին կարող եք ծանոթանալ հետևյալ հղումներով.

• Թուրքիայի արևելքում շարունակվում են քրդերի հետ բախումները
• Թուրքիայի արևելքում թուրք-քրդական բախումներում սպանվել է 2, վիրավորվել` 13 ուժային
• Թուրք-քրդական բախումներ Թուրքիայի արևելքում. դեկտեմբերի 22-23
• Թուրք-քրդական բախումներ Թուրքիայի արևելքում. դեկտեմբերի 23-24
• Թուրք-քրդական բախումներ Թուրքիայի արևելքում. դեկտեմբերի 24-25

Թուրքական ուժայինները Ջիզրեում տանկերով և զրահամեքենանով