«Քրդստանի աշխատավորական կուսակցությունը» (PKK) կազմալուծել է Թուրքիայի արևելքում ուժայինների դեմ պայքարող «Հայրենասիրական հեղափոխական երիտասարդական շարժումը» (YDG-H)` հիմնելով նոր «Քաղաքացիականների պաշտպանության ստորաբաժանումներ» (YPS – Yekineyen Parastina Sivil) անվամբ նոր կառույց, որի մեջ մտել են YDG-H-ն, PKK-ի «Ինքնապաշտպանության ուժերը», ինչպես նաև գյուղական վայրերում, լեռներում տեղակայված քրդական ուժերը: Այս մասին դեկտեմբերի 30-ին հայտնում է թուրքական «Միլլիեթ» պարբերականի կայքը:
Նշվում է, որ գյուղական վայրերում, լեռներում տեղակայված քուրդ զինյալներն իջնելու են քաղաքներ, խոշոր բնակավայրեր` տեղի քուրդ բնակիչներին թուրքական ուժայիններից պաշտպանելու համար: Նոր կազմակերպության հիմնական նպատակը Թուրքիայում քրդական PKK-ի ուժերը կենտրոնացնելն է:
Նշենք, որ 2015-ի դեկտեմբերին Թուրքիայի արևելքում վերսկսվեցին թուրք-քրդական բախումները, որոնցում ներգրավված են Թուրքիայի ԶՈւ առնվազն 10 հազար զինծառայողներ` 14 գեներալի գլխավորությամբ, ինչպես նաև մի քանի հազար ոստիկան, որոնց մասին հստակ տվյալներ չեն հրապարակվում:
Թուրք-քրդական բախումների լուսաբանումներին կարող եք ծանոթանալ այստեղ, որտեղ մանրամասն ներկայացրել ենք թուրքական և քրդական աղբյուրների անդրադարձերը:
«Քրդստանի աշխատավորական կուսակցությունը» (Partiya Karkerên Kurdistan կամ PKK) քրդական կազմակերպություն է, որի հիմնական նպատակը զինված պայքարի միջոցով Թուրքիայի հարավարևելյան, Իրաքի հյուսիսային, Իրանի հյուսիսարևմտյան և Սիրիայի հյուսիսարևելյան տարածքներում քրդական անկախ պետության հիմնումն է` Դիարբեքիր մայրաքաղաքով:
Կազմակերպության հիմքում ընկած են մարքսիստական, սոցիալիստական և քուրդ ազգայնականության գաղափարախոսությունները: PKK-ի ռազմական թևը «Ժողովրդի պաշտպանական ուժեր»-ն են (Hêzên Parastina Gel — HPG, անգլ.` People’s Defence Forces). PKK-ի, ինչպես նաև վերջինիս ռազմական թևի ինտերնետային կայքերն արգելափակված են թուրքական դատարանի որոշմամբ: Հավելենք, որ երբեմն PKK-ն վերջինիս ռազմական թևի անվամբ կոչում են նաև HPG. կազմակերպության կանանց թևը YJA STAR-ն է (քրդերեն` Yekîneyên Jinên Azad ên Star, անգլ.` Free Women’s Units).
Կազմակերպությունը 1978 թվականին Դիարբեքիրում հիմնադրել է Աբդուլլահ Օջալանը (Ափո)` իբրև ձախ սոցիալիստական կուսակցություն: 1980-ի ռազմական հեղաշրջումից հետո այն արգելվել է, իսկ ղեկավարները փախել են Սիրիա: 1998-ի Սիրիայի նախագահ Հաֆեզ Ասադը Թուրքիայի ճնշմամբ Օջալանին զրկվում է աջակցությունից, և վերջինս ստիպված լինում այլ տեղ քաղաքական ապաստան որոնել: Նույն թվականին ՌԴ պետդուման դիմում է նախագահ Բորիս Ելցինին` Օջալանին քաղաքական ապաստան տրամադրելու առաջարկով, սակայն այն չի հաստատվում:
1999-ին թուրքական հատուկ նշանակության ուժերը իսրայելական հատուկ նշանակության ուժերի օգնությամբ Քենիայում ձերբակալում են Օջալանին և դատապարտում մահապատժի, ինչը եվրոպական երկրների ճնշման ներքո փոխարինվում է ցմահ ազատարկմամբ: Ափոն մինչ օրս ցմահ ազատազրկում է կրում թուրքական Իմրալը կղզու բանտում, սակայն շարունակում է համարվել կազմակերպության ղեկավարը։ Թուրքական կառավարությունը մեծ ճնշում է գործադրում նրա վրա և օգտագործում PKK-ի պայքարը դադարեցնելու համար:
Թերևս կարելի է նշել, որ ոչ այնքան եվրոպական երկրների ճնշման ներքո, որքան որ հենց այս նկատառումով է մահապատիժը փոխարինվել ցմահ ազատազրկմամբ: Հավելենք, որ Օջալանը վերջին տարիներին PKK-ին բազմիցս կոչ է արել վայր դնել զենքերը` ըստ երևույթին այդ քայլին գնալով թուրքական կառավարության ճնշումներիր պատճառով, սակայն իրականում նա այլևս չի կարողանում ազդել կառույցի որոշումների վրա, որոնք կայացվում են Իրաքի տարածքում գտնվող PKK-ի ղեկավարության կողմից:
Pingback: Քրդական նոր կառույցը կհամակարգի Թուրքիայի քրդական զինված խմբերի գործունեությունը | Ռազմ.info
Pingback: Թուրք-քրդական զինված բախումներ Թուրքիայի արևելքում. հունվարի 29 – փետրվարի 1 | Ռազմ.info
Pingback: Թուրք-քրդական զինված բախումներ Թուրքիայի արևելքում. 1– 2 փետրվար | Ռազմ.info