Ռուս զինվորականները կմասնակցեն ԱՄՆ-ում կայանալիք հակաահաբեկչական զորավարժություններին

Ռուս զինվորականները ԱՄՆ-ի և Կանադայի օդատիեզերական պաշտպանության հրամանատարության(NORAD) իրենց գործընկերների հետ համատեղ օգոստոսի 27-29-ը կմասնակցեն միջազգային «Զգոն արծիվ-2012» հակաահաբեկչական զորավարժություններին: Այդ մասին երկուշաբթի լրագրողներին հայտնել է Ռուսաստանի Արևելյան ռազմական շրջանի(ԱՌՇ) մամլո ծառայության պետ՝ գնդապետ Ալեքսանդր Գորդեևը:
Զորավարժություններին, որոնց հրամանտարական շտաբները տեղակայված են Խաբարովսկում, Պետրոպավլովսկ-Կամչատկայում, Կոլորադո-Սպրինգսում և Անկորիջեում(Ալյասկա), ներգրավված են Ռուսաստանի (ԱՌՇ), ԱՄՆ-ի և Կանադայի զինված ուժերի ստորաբաժանումներ:
Առաջին անգամ նման զորավարժություններ անցկացվել են 2010-ին:
ԱՌՇ ներկայացուցիչները զորավարժություններին մասնակցելու նպատակով արդեն մեկնել են Խաբարովսկից:
Նշենք, որ Հյուսիսային Ամերիկայի օդատիեզերական պաշտպանության հրամանատարությունը (North American Aerospace Defense Command, NORAD) ԱՄՆ-ի և Կանադայի օդային տարածքի պաշտպանության համատեղ համակարգ է: