Պակիստանյան հրետանին կրկին հրետակոծել է Աֆղանստանի Քունար նահանգը

Պակիստանի հրետանին ուրբաթ կրկին հրետակոծել է Աֆղանստանի արևելյան Քունար նահանգը: Հրետակոծության հետևանքով մի քանի տուն փլատակների է վերածվել: Բարեբախտաբար զոհեր և տուժածներ չկան:
Քունարի նահանգապետ Վազիֆուլի Վազեֆին կոչ է արել ՆԱՏՕ-ի հրամանատարությանը կրակի դադարեցման նպատակով ճնշում գործադրել Պակիստանի վրա:
Աֆղանական Պաժվակ լրատվական գործակալության տվյալներով՝ Պակիստանին հակահարվածելու նպատակով Քունարում սկսել են ձևավորվել երիտասարդական ինքնապաշտպանական ջոկատներ:
Միաժամանակ գործակալությունը հայտնում է, որ անվտանգության ուժեր և հրետանի է ուղարկվել Քունար:
Նշենք , որ վերջին երեք ամիսների ընթացքում Քունարի վրա շուրջ 4 հազար արկ և հրթիռ է արձակվել, ինչի հետևանքով 30 մարդ է զոհվել, ավելի քան 1,4 հազար աֆղանցի ստիպված է եղել թողնել տներն ու բնակության առավել ապահով վայր ընտրել:
Պակիստանին հակահարված տալու անկարողության պատճառով Աֆղանստանի պառլամենտը անվստահություն է հայտնել Ներքին գործերի և պաշտպանության նախարարներին, ինչի հետևանքով վերջիններս հեռացվել են զբաղեցրած պաշտոններից: