Իսլամական 34 երկրների մասնակցությամբ ստեղծված հակաահաբեկչական կոալիցիան, որը գործում է Սաուդյան Արաբիայի գլավորությամբ, քննարկում է Սիրիա հատուկ նշանակության ստորաբաժանումներ ուղարկելու հարցը: Այս մասին բրիտանական Reuters լրատվական գործակալության փոխանցմամբ հայտնել է Սաուդյան Արաբիայի արտգործնախարարը:
Սաուդյան Արաբիայի ԶՈւ հատուկ նշանակության ստորաբաժանում
Սաուդյան Արաբիայի արտգործնախարարը մասնավորապես նշել է, որ Սիրիա հատուկ նշանակության ստորաբաժանումներ ուղարկելու հարցը ներկա փուլում քննարկում են Սաուդյան Արաբիան, Բահրեյնը, Արաբական Միացյալ Էմիրությունները և Քաթարը, սակայն չի բացառվում, որ կոալիցիայի մեջ մտած մյուս երկրները ևս կարող են ներգրավվել:
Հիշեցնենք, որ երեկ` դեկտեմբերի 15-ին, տարածված հայտարարության համաձայն` Սաուդյան Արաբիայի գլխավորությամբ 34 մուսուլմանական երկրներ ահաբեկչության դեմ պայքարելու նպատակով կոալիցիա էին ստեղծել: Ռազմական գործողությունները համակարգելու համար միացյալ շտաբը տեղեկայվելու է Սաուդյան Արաբիայի մայրաքաղաք Ռիյադում: Թուրքիան ևս հաստատել էր իր մասնակցությունը կոալիցիայի գործողություններին:
Սաուդյան Արաբիայի պաշտպանության նախարարը հայտնել էր, որ կոալիցիան պայքարելու է ահաբեկչական բոլոր կառույցների` այդ թվում նաև՝ «Իսլամական պետություն» ահաբեկչական խմբավորման դեմ: Պայքարի հիմնական գոտիներն են լինելու Իրաքը, Սիրիան, Լիբիան, Աֆղանստանը և Եգիպտոսը, որտեղ ահաբեկչական կառույցներն առավել ակտիվ գործունեություն են ծավալում: