Թուրքական «Ասելսան» ռազմարդյունաբերական ընկերությունը դեկտեմբերի 7-ին արտասահմանյան պատվիրատուի հետ ստորագրել է գիշերային տեսանելիության սարքերի մատակարարման 17 մլն ամերիկյան դոլար արժողությամբ պայմանագիր։ Այս մասին դեկտեմբերի 8-ին հայտնում է թուրքական ընկերության կայքը։
«Ասելսան» ընկերության արտադրության գիշերային տեսանիելիության սարքեր
Պայմանագրով նախատեսված տեխնիկայի մատակարարումը պետք է սկսվի 2016 թվականից, սակայն ընկերության տարածած հաղորդագրությունում այդպես էլ չի նշվում արտասահմանյան պատվիրատուի «ինքնությունը»։
Թուրքական ընկերությունը սովորաբար բացահայտում է իր պատվիրատուներին, սակայն այս անգամ, ըստ երևույթին, պատվիրատուի խնդրանքով գաղտնի է պահում տեղեկությունը, ինչը կասկածների տեղիք է տալիս։
Թուրքիայի խոշորագույն ռազմարդյունաբերական ընկերությունը՝ «Ասելսանը», հիմնականում զբաղվում է օպտիկա-էլեկտրոնային համակարգերի, ինչպես նաև անօդաչու թռչող սարքերի, ռումբերի կառավարման համակարգերի, ինչպես նաև այլ սարքավորումների արտադրությամբ ու վաճառքով։