Թուրքական զինուժում կտրուկ պակասել է ժամկետայինների թվաքանակը (աղյուսակ)

Թուրքիայի ԶՈւ ԳՇ կայքը դեկտեմբերի 7-ին հրապարակել է զինված ուժերի թվաքանակի մասին տվյալները, ըստ որոնց՝ ԶՈւ անձնակազմը 612,862 է, ինչը շուրջ 26,5 հազարով պակաս է նոյեմբերին հրապարակված ցուցանիշից (639,511): Տվյալները հրապարակվել են Թուրքիայի ԶՈւ ԳՇ կայքում։

Թուրքիայի ԶՈւ ժանդարմերիայի գլխավոր հրամանատարության հատուկ գործողությունների ստորաբաժանում

Թուրքական զինուժում գեներալների և ծովակալների թիվը 358 է, որից 325-ը՝ ցամաքային, ռազմաօդային և ռազմածովային ուժերում, 32-ը՝ ժանդարմերիայում, 1-ը՝ առափնյա անվտանգության ուժերում։ Օգոստոսից ի վեր գեներալների թվաքանակը նվազել է միայն մեկով, իսկ օգոստոսին ավելացել էր 13-ով՝ կապված զինված ուժերի հրամանատարական կազմի փոփոխության և նոր գեներալների նշանակման հետ։

Սպաների ընդհանուր թիվը 39,721 է, որից 32,554-ը՝ ցամաքային, ռազմաօդային և ռազմածովային ուժերում, 6,499-ը՝ ժանդարմերիայում, 668-ը՝ առափնյա անվտանգության ուժերում։ Սպաների թվաքանակը վերջին ամսվա ընթացքում գրեթե փոփոխության չի ենթարկվել։

Ենթասպաների (կրտսեր հրամանատարական կազմ) ընդհանուր կազմը 97,243 է, որից 70,183-ը՝ ցամաքային, ռազմաօդային և ռազմածովային ուժերում, 25,484-ը՝ ժանդարմերիայում, 1576-ը՝ առափնյա անվտանգության ուժերում։ Ենթասպաների ընդհանուր թվաքանակը վերջին մեկ ամսվա ընթացքում ևս զգալի փոփոխություններ չի կրել։

Պայմանագրային ժանդարմների ընդհանուր քանակը 22,043 է, պայմանագրային եֆրեյտորների և շարքայինների թիվը՝ 8054, որից 36-ը առափնյա անվտանգության ուժերում, իսկ 8018-ը՝ ցամաքային զորքերում։ Նախորդ ամսվա համեմատ՝ պայմանագրային եֆրեյտորների և շարքայինների թիվը նվազել է շուրջ 500-ով (եղել է 7480)։

Հատուկ պայմանագրային եֆրեյտորների ընդհանուր քանակը 71,029 է, որից 47,969-ը՝ ցամաքային, ռազմաօդային և ռազմածովային ուժերում, 22,394-ը՝ ժանդարմերիայում, 666-ը՝ առափնյա անվտանգության ուժերում։ Հատուկ պայմանագրային եֆրեյտորների թվաքանակն ավելացել է շուրջ 250-ով։ Նկատելի է, որ չնայած զինված ուժերի ընդհանուր թվաքանակի նվազմանը` թեև ոչ այնքան մեծ թվաքանակով, սակայն ավելացել է պրոֆեսիոնալ զինծառայողների թվաքանակը: Հավելենք, որ պրոֆեսիոնալ զինծառայողների ընդհանուր թվաքանակը 238.448 է, որը ԶՈւ ընդհանուր թվաքանաի շուրջ 42 %-ն է:

Պարտադիր զինծառայություն անցնողների ընդհանուր թվաքանակը 322,706 (նոյեմբերին ներկայացված տվյալներով` 350,695 ) է, որից 238,864  (255,574)-ը՝ ցամաքային, ռազմաօդային և ռազմածովային ուժերում, 82,538 (93,377)-ը՝ ժանդարմերիայում, 1304 (1744)-ը՝ առափնյա անվտանգության ուժերում։

Նոյեմբերին հրապարակված ցուցանիշների համեմատությամբ պարտադիր զինծառայություն անցնողների թվաքանակն ընդհանուր առմամբ նվազել է 27,989-ով, հուլիսի համեմատ՝ շուրջ 40 հազարով, իսկ հունիսին հրապարակված ցուցանիշի համեմատ` շուրջ 68 հազարով։  Վերջին մեկ ամսվա ընթացքում Թուրքիայի ԶՈւ ժամկետային զինծառայողների թվաքանակի նման կտրուկ նվազում, ըստ երևույթին, կապված է զորացրում-զորահավաքի հետ։

Քաղաքացիական ծառայողների և աշխատողների քանակը 51.708 է, որից 47.335-ը՝ ցամաքային, ռազմաօդային և ռազմածովային ուժերում, 3.453-ը՝ ժանդարմերիայում, 920-ը՝ առափնյա անվտանգության ուժերում։ Այս ցուցանիշներում շոշափելի փոփոխություններ չկան։

Այսպիսով, Թուրքիայի ԶՈւ-ի ընդհանուր թվաքանակը 612,862 (Նոյեմբերին ներկայացված տվյալներով` 639,551) է, որից 445,248-ը (460,176)՝ ցամաքային, ռազմաօդային և ռազմածովային ուժերում, 162,443-ը (173,754)՝ ժանդարմերիայում, 5171-ը՝ առափնյա անվտանգության ուժերում։

ԶՈւ ընդհանուր թվաքանակը նախորդ ամսվա համեմատ նվազել է 26,689-ով։ Ցամաքային, ռազմաօդային և ռազմածովային ուժերում զինծառայողների թվաքանակը նվազել է  շուրջ 15 հազարով, ժանդարմերիայում ՝շուրջ 11 հազարով։

Պրոֆեսիոնալ զինծառայողներ են ընդհանուր զինուժի 42 տոկոսը։ Ցամաքային, ռազմաօդային, ռազմածովային ուժերում պրոֆեսիոնալ հիմունքներով է ծառայում զինծառայողների 40 տոկոսը, ժանդարմերիայում՝ 48 տոկոսը, իսկ առափնյա անվտանգության ուժերում՝ 69 տոկոսը։