Այսօր՝ դեկտեմբերի 3-ին, ՀԱՊԿ արտգործնախարարները հանդիպել են Բելգրադում և քննարկել Հավաքական անվտանգության խորհրդի՝ 2015թ. սեպտեմբերին կայացած նստաշրջանի որոշումների կատարման ընթացքը, ՀԱՊԿ անդամ երկրների արտաքին քաղաքականության համադրման հարցեր։ Այս մասին տեղեկացնում է ՀՀ ԱԳՆ կայքը:
ՀԱՊԿ արտգործնախարարների խորհրդի անդամներն անդրադարձել են նաև ԵԱՀԿ անդամ պետությունների ԱԳ նախարարների 22-րդ խորհրդի օրակարգային հարցերին։ (Նշենք, որ արտգործնախարարները Բելգրադում հավաքվել են հենց ԵԱՀԿ անդամ պետությունների արտգործնախարարների 22-րդ խորհրդի շրջանակներում):
Հանդիպման մասնակիցները մտքեր են փոխանակել գլոբալ և տարածաշրջանային անվտանգության վրա ազդեցություն ունեցող խնդիրների, ահաբեկչության դեմ պայքարի վերաբերյալ։
Անդրադարձ է արվել թուրքական զինված ուժերի կողմից Սիրիայում հակաահաբեկչական գործողությանը մասնակցող ռուսաստանյան Սու-24 ինքնաթիռի խոցման հետևանքով ստեղծված իրավիճակին։
Այս համատեքստում ՀՀ ԱԳ նախարար Նալբանդյանը նշել է, որ ինքնաթիռի խոցումը լուրջ հարված է ահաբեկչության դեմ պայքարում միջազգային հանրության ջանքերի համախմբմանը և Սիրիայում քաղաքական կարգավորման գործընթացին։
ՀԱՊԿ անդամ երկրների ԱԳ նախարարները հավանություն են տվել դեկտեմբերին Մոսկվայում կայանալիք Հավաքական անվտանգության խորհրդի օրակարգի հարցերին, մտքեր փոխանակել ՀԱՊԿ կանոնադրական մարմինների աշխատանքների վերաբերյալ։
Pingback: Ռազմաշաբաթ. Հայաստան. նոյեմբերի 29 – դեկտեմբերի 5, 2015 | Ռազմ.info