Նոյեմբերի լույս 29-ի գիշերը Դաղստանի Սուլեյման-Ստալսկի և Մագարամքենթ շրջանների առանձին վայրերում՝ Աշագա-Ստալ, Իսպիկ և Կասումքենթ բնակավայրերում, հայտարարվել է հակաահաբեկչական գործողության ռեժիմ։ Հատուկ գործողության ժամանակ սպանվել է 3 գրոհային։ Այս մասին հաղորդում է «ՌԻԱ Նովոստի» լրատվական գործակալությունը՝ հղում անելով ՌԴ ազգային հակաահաբեկչական հանձնաժողովի մամուլի ծառայությանը։
ՌԴ ուժայիններ
Հանձնաժողովի տվյալներով՝ տեղի ուժային կառույցները հետախուզաորոնողական միջոցառումների շնորհիվ պարզել են զինված խմբավորման թաքստոցը։ Գործողության սկզբում վերջիններիս առաջարկվել է հանձնվել, սակայն զինյալները կրակել են անվտանգության աշխատակիցների ուղղությամբ՝ փորձելով թաքնվել։ Պատասխան կրակից սպանված 3 զինյալների ինքնությունն արդեն հայտնի է։
Նշվում է, որ զինյալները հավատարմության երդում են տված եղել «Իսլամական պետություն» ահաբեկչական կազմակերպությանը, կռվել են Սիրիայում և եղել են հետախուզման մեջ։ Նրանցից մեկը Մահմուդ Մահմուդովն է՝ ծնված 1979-ին, որը գլխավորել է «Տաբասարանովսկ» ահաբեկչական խմբավորումը, մյուսը՝ Ռովերտ Մելիքովը՝ ծնված 1985-ին, ղեկավարել է «Սուլեյման-ստալսկ» հանցախումբը, երրորդը՝ Հասան Մամեդյարովը՝ ծնված 1989-ին։ Վերջինս զինյալների շարքերում Սիրիայում կռվելուց հետո այս տարի վերադարձել էր Դաղստան ու միացել «Սուլեյման-ստալսկ» խմբավորմանը։
Հավելենք, որ նոյեմբերի 17-ին Դաղստանի նախագահ Ռամզան Աբդուլատիպովը ռուսաստանյան «Գովորիտ Մոսկվա» ռադիոընկերության եթերում խոսել է այդ հանրապետությունում զինյալների թվի ու ուժայինների կատարած աշխատանքի մասին՝ նշելով, որ մեկ ու կես տարվա ընթացքում Դաղստանում ահաբեկչություն չի եղել։ Դաղստանի ղեկավարը նաև հայտարարել էր, որ այժմ Դաղստանում 30-40 մարդ է հաշվվում այդպիսի ընդհատակյա խմբերում։ Չնայած կան նաև հսկայական թվով մարդիկ, ովքեր պետության սահմաններից դուրս են։