Հայաստանը հակատանկային «Միլան» համակարգերը գնել է Հունաստանից. զեկույց

Ռուսաստանյան «Զենքի համաշխարհային առևտրի վերլուծության կենտրոնի» (ЦАМТО) նոր հրապարակած զեկույցից հայտնի է դառնում, որ Հայաստանը 2012 թ. «Միլան» (Milan) հակատանկային հրթիռային համակարգերը գնել է Հունաստանից: Ըստ կենտրոնի՝ ֆրանս-գերմանական արտադրության համակարգերը մատակարարվել են 2013 թվականին:

«Միլան» հակատանկային հրթիռային համալիր

Կենտրոնի զեկույցում չի նշվում, թե քանի միավոր համակարգից է բաղկացած եղել Հունաստանից ստացած խմբաքանակը և որքան է դրանց համար վճարել Հայաստանը:

Նշենք, որ հակատանկային «Միլան» համակարգն աչքի է ընկնում բարձր արդյունավետությամբ. շուրջ 50000 մարտական և ուսումնական արձակումներից թիրախի խոցմամբ են ավարտվել ավելի քան 92%-ը։

Ռուսաստանյան «Զենքի համաշխարհային առևտրի վերլուծության կենտրոնի» հրապարակած զեկույցի՝ Հայաստանին վերաբերող մասերից մեկը

Հիշեցնենք նաև, որ Հայաստանում «Միլան» հակատանկային համակարգի առկայության մասին Razm.info-ն տեղեկացրել էր դեռևս 2013 թվականին, երբ այդ համակարգը ցուցադրվեց պաշտպանության նախարարությունում կազմակերպված ցուցահանդեսի ժամանակ։ Այդ լուրը բավականին մեծ աղմուկ առաջացրեց Ադրբեջանում և, ադրբեջանական լրատվամիջոցների հաղորդմամբ, Բաքուն բողոք հայտնեց Ֆրանսիային և Գերմանիային։

2013 թ. Ադրբեջանը բողոք էր հայտնել Ֆրանսիային և Գերմանիային