[Թարմացված] Թուրքիան ՌԴ ԶՈւ ինքնաթիռ է խոցել Սիրիայի սահմանամերձ հատվածում

Այսօր՝ նոյեմբերի 24-ի առավոտյան, Սիրիայի՝ Թուրքիայի հետ սահմանամերձ հատվածում Թուրքիան խոցել է Ռուսաստանի զինված ուժերի Սու-24Մ ռմբակոծիչ: Ինքնաթիռի օդաչուն ենթադրաբար կատապուլտով դուրս է թռել ինքնաթիռից մինչև դրա վայր ընկելը, նրա մասին տեղեկությունները ճշտվում են: Այս մասին, ըստ «Բլումբերգի», հայտնել են Թուրքիայի նախագահականի աղբյուրները:

Թարմացում. Թուրքիայի ԶՈւ ԳՇ կայքը հայտնում է, որ Թուրքիայի օդային տարածքը խախտելու համար «անհայտ օդանավին» 10 անգամ զգուշացնելուց հետո թուրքական F-16 կործանիչները խոցել են այն:

Տեսանյութում ինքնաթիռի անկման պահն է.

Թուրքական աղբյուրները նաև նշել են, որ մինչ խոցումը թուրքական F-16 կործանիչները մոտեցել են ռուսաստանյան ինքնաթիռին և նախազգուշացրել նրան:

Ռուսաստանի պաշտպանության նախարարությունը հաստատել է ինքնաթիռի անկման մասին տեղեկությունը, նշելով, որ հավանական է՝ ինքնաթիռը խոցվել է վերգետնյա միջոցներով, թեև չի նշել, որ խոցողը եղել է Թուրքիան:

Ռուսաստանյան կողմը հատուկ շեշտում է, որ թռիչքի ամբողջ ընթացքում ռուսաստանյան ինքնաթիռը եղել է Սիրիայի օդային տարածքում:

Մինչ այդ, թուրքական լրատվակայքերն արդեն տարածում են ինքնաթիռի անկման տեսանկարահանումը և նշում, որ այն ընկել է Սիրիայի թուրքմենաբնակ Յամադի գյուղում (անմիջապես սահմանակից է Թուրքիային):