Նոյեմբերի 19-ին Վրաստանի պաշտպանության նախարարի տեղակալ Աննա Դոլիձեն ներկայացրել է Գորիում տեղակայված Աբրամիշվիլիի անվան զինվորական հոսպիտալի նոր պետին՝ կապիտան Գեորգի Մաիսուրաձեին և վերջինիս տնտեսական հարցերով տեղակալ Իռմա Չանթուրիձեին։ Այս մասին տեղեկացնում է Վրաստանի պաշտպանության նախարարության մամուլի ծառայությունը։
Վրաստանի պաշտպանության նախարարի տեղակալն ու Աբրամիշվիլիի անվան զինվորական հոսպիտալի նոր պետը
«Կարևոր է, որ նոր ղեկավարը զինվորական է, կրթություն է ստացել Թուրքիայում՝ Վրաստանի գործընկեր և ՆԱՏՕ անդամ երկրում»,—հայտարարել է Դոլիձեն։
Կապիտան Գեորգի Մաիսուրաձեն 2007 թվականին ավարտել է Թուրքիայի «Գյուլհանե» ռազմաբժշկական ակադեմիայի բժշկական ֆակուլտետը և 2013 թվականին նույն ակադեմիայում վերջինիս տրվել է սրտաբանության դոկտորի աստիճան։ 2014-15 թթ. աշխատել է Գորիում տեղակայված հոսպիտալում՝ որպես բժիշկ-սրտաբան։
Մեկ այլ փոփոխություն էլ եղել է Վրաստանի ազգային «Կրծանիսի» ուսումնական կենտրոնում։ Նոյեմբերի 17-ին Վրաստանի պաշտպանության նախարարը ներկայացրել է այդ կենտրոնի նոր ղեկավարին՝ գդապետ Գրիգոլ Չելիձեին։ Չելիձեն մինչև նոր պաշտոնում նշանակվելը եղել է Վրաստանի զինված ուժերի ցամաքային զորքերի արևելյան օպերատիվ խմբավորման հրամանատարը։
Վրաստանի պաշտպանության նախարարն ու «Կրծանիսի» ազգային ուսումնական կենտրոնի նորանշանակ ղեկավարը
Հիշեցնենք, որ օգոստոսի 27-ին «Կրծանիսի» ազգային ուսումնական կենտրոնում պաշտոնապես բացվել է Վրաստան-ՆԱՏՕ ուսումանական կենտրոնը։ Համատեղ կենտրոնը խորհրդանշող արձանը (Վրաստանի քարտեզը՝ Աբխազիայիով և Հարավային Օսիայով) բացել են ՆԱՏՕ-ի գլխավոր քարտուղար Յենս Ստոլտենբերգը, Վրաստանի վարչապետ Իրակլի Ղարիբաշվիլին և պաշտպանության նախարար Թինա Խիդաշելին։
Համատեղ ուսումնական կենտրոնի բացումը դեռևս չի նշանակում, որ կենտրոնը սկսելու է իր աշխատանքը։ Կենտրոնի համար ենթակառուցվածքների կառուցման և վերջնական տեսքի բերման աշխատանքները շարունակվելու են հետագայում։
Թե´ ՆԱՏՕ-ի ներկայացուցիչները, թե´ վրաստանյան կողմը նշում են, որ կենտրոնում սովորելու են ՆԱՏՕ-ի անդամ և գործընկեր երկրների զինված ուժերի զինծառայողներ։