Նոյեմբերի 18-ին ՌԴ ԶՈւ գլխավոր շտաբի օպերատիվ կառավարման ղեկավար, գեներալ-գնդապետ Անդրեյ Կարտապալովը հայտնել է, որ Ռուսաստանի զինված ուժերը համատեղ գործողություններ կիրականացնեն ֆրանսիական ռազմածովային ուժերի հետ ընդդեմ ԻՊ-ի։ Այս մասին հայտնում է ռուսաստանյան TACC լրատվական գործակալությունը։
«ՌԴ նախագահ Վլադիմիր Պուտինի հրամանով ռուսաստանյան զինված ուժերը հակաահաբեկչական պայքարում կհամագործեն ֆրանսիական ռազմածովային ուժերի հետ։ Ֆրանսիական «Շարլ դե Գոլլ» ավիակիր ռազմանավի ժամանմամբ կսկսվեն համատեղ գործողությունները»,- ասել է Կարտապալովը։
Նշենք, որ ավելի վաղ Ֆրանսիայի նախագահ Օլանդը հայտնել էր, որ «Շարլ դե Գոլլ» ռազմանավը նոյեմբերի 19-ին դուրս է գալու Ֆրանսիայի հարավում, Միջերկրական ծովի ափին գտնվող Տուլոն քաղաքի ռազմական նավահանգստից։
Հիշեցնենք, որ նոյեմբերի 17-ին Ռուսաստանի և Ֆրանսիայի նախագահներ Վլադիմիր Պուտինը և Ֆրանսուա Օլանդը հեռախոսազրույց են ունեցել միջազգային ահաբեկչության դեմ երկկողմ համագործակցության ակտիվացման մասին:
Կողմերը մասնավորապես պայմանավորվել են ռազմական գերատեսչությունների և հատուկ ծառայությունների ավելի սերտ կապեր ապահովել Սիրիայում երկու երկրների հակաահաբեկչական պայքարում: Այս հարցերի վերաբերյալ առավել մանրամասն զրույց կողմերը պայմանավորվել են անցկացնել Մոսկվայում նոյեմբերի 26-ին։ (Ավելի վաղ հայտնի էր դարձել, որ Սիրիայում հակաահաբեկչական պայքարի վերաբերյալ բանակցությունների համար Ֆրանսիայի նախագահն այցելելու է Մոսկվա և Վաշինգթոն):
Հիշեցնենք նաև, որ ՌԴ նախագահ հաղորդագրության մեջ նշվում է, որ Վլադիմիր Պուտինը նոյեմբերի 17-ին ՌԴ պաշտպանության կառավարման ազգային կենտրոնում խորհրդակցություն էր անցկացրել Սիրիայում Ռուսաստանի օդատիեզերական ուժերի գործողությունների վերաբերյալ: Խորհրդակցության ժամանակ ՌԴ նախագահը Միջերկրական ծովում ռուսաստանյան նավատորմի ղեկավարին հայտնել է, որ նրանց ուղղությամբ շարժվում է ֆրանսիական ռազմանավերի խումբ՝ ավիակրի գլխավորությամբ, և որ այդ խմբի հետ պետք է ուղիղ կապ հաստատել և աշխատել որպես դաշնակից:
Նույն խորհրդակցության ժամանակ Ռուսաստանի ռազմական գերատեսչության ղեկավարությունը երկրի նախագահին զեկուցել է «Իսլամական պետություն» խմբավորման դիրքերին ռազմավարական ավիացիայի հասցրած հարվածների մասին: Նշվել է, որ ռազմավարական ավիացիան ներգրավվել է Ռուսաստանի նախագահի հանձնարարության համաձայն, որով վերջինս կարգադրել էր ուժեղացնել ավիահարվածներն ահաբեկիչների դիրքերի ուղղությամբ: Պուտինի այդ հրահանգը եղել էր այն բանից հետո, երբ պարզվել էր, որ հոկտեմբերի 31-ին Եգիպտոսում ռուսաստանյան ինքնաթիռի անկման պատճառը եղել է ահաբեկչությունը:
Տեսանյութում ներկայացված են ՌԴ ռազմավարական ավիացիայի հարվածները «Իսլամական պետության» դիրքերին (17 նոյեմբերի, 2015թ.):
Ավելացնենք, որ Փարիզում նոյեմբերի 13-ին կատարված ահաբեկչությունից և այն բանից հետո, երբ պարզվեց, որ հոկտեմբերի 31-ին Եգիպտոսում ռուսաստանյան ինքնաթիռի անկման պատճառը ահաբեկչությունն է, Ֆրանսիան և Ռուսաստանն ակտիվացրել են իրենց գործողությունները Սիրիայում «Իսլամական պետություն» ահաբեկչական խմբավորման դեմ:
Pingback: Ֆրանսիայի ԶՈւ ավիակիրն առաջին գործողություններն է սկսել ԻՊ դեմ | Ռազմ.info