Լիտվայում անցկացվում է միջազգային և տեղական 5 զորավարժություն. Վրաստանի ԶՈւ 3 սպա դիտորդ է

Նոյեմբերի 9-ին Լիտվայում մեկնարկել են միանգամից 5 տեղական և միջազգային զորավարժություններ, որոնք շարունակվելու են մոտ 1 ամիս։ Զորավարժություններին ընդհանուր առմամբ մասնակցում են 2800 զինծառայող 11 երկրից՝ ԱՄՆ-ից, Կանադայից, Բրիտանիայից, Գերմանիայից, Չեխիայից, Վրաստանից, Ուկրաինայից, Հունգարիայից, Լատվիայից, Լեհաստանից և Լիտվայից, ինչպես նաև ՆԱՏՕ-ի արագ արձագանքման ուժերը (Allied Rapid Reaction Corps (ARRC))։ Այս զորավարժություններից 2-ը շարունակվելու են նաև Բալթյան այլ երկրներում։ Հայտնում է Լիտվայի զինված ուժերի պաշտոնական կայքը։

Iron Sword 2015 զորավարժության բացման արարողությունը։ Նկարը՝ Լիտվայի ԶՈւ պաշտոնական կայքի

Iron Sword 2015 զորավարժության բացման արարողությունը։ Նկարը՝ Լիտվայի ԶՈւ պաշտոնական կայքի

«Լիտվայում անցկացվող զորավարժությունների հաճախակիությունը ներկայիս աշխարհաքաղաքական իրավիճակի համատեքստում ցույց է տալիս ինչպես լիտվական բանակի պատրաստվածությունը երկրի պաշտպանության համար, այնպես էլ ՆԱՏՕ-ի մոտեցումը Արևելյան Եվրոպայի հավաքական անվտանգության պատրաստությանը։ Մենք փորձելու ենք պահպանել հավասարակշռությունը միջազգային և տեղական զորավարժությունների միջև, քանի որ ռազմական ագրեսսիայի դեպքում հարկ է լինելու պաշտպանվել առաջին հերթին նրանով, ինչ ունենք, ինչին մենք ընդունակ ենք»,—հայտարարել է Լիտվայի զինված ուժերի գլխավոր հրամանատար, գեներալ-լեյտենանտ Յոնաս Վիտաուտաս Ժուկասը (Jonas Vytautas Žukas)։

5 զորավարժություններից միջազգային «Երկաթյա սուր-2015» (Iron Sword 2015) զորավարժությունը մեկնարկել է նոյեմբերի 8-ին և կշարունակվի մինչև նոյեմբերի 20-ը Պաբրադ քաղաքում տեղակայված զորավարժարանում։ Այս զորավարժությանն առաջին անգամ մասնակցում են նաև Վրաստանցի զինծառայողները։

Ինչպես տեղեկացնում է վրաստանյան Newsgeorgia լրատվակայքը, Վրաստանի ՊՆ-ից իրենց հայտնել են, որ Վրաստանից զորավարժությանը մասնակցելու է 3 սպա։

«Վրաստանի Ազգային գվարդիայի շտաբի 3 սպա զորավարժությանը կմիանա նոյեմբերի 13-ից։ Նրանք միջազգային զորավարժությանը ներկա են լինելու որպես դիտորդներ»,— հաղորդում է լրատվամիջոցը՝ հղում անելով Վրաստանի ՊՆ-ին։
ԱՄՆ-ն զորավարժությանը մասնակցելու իր «Բրեդլի» հետևակի մարտական մեքենաներով և Abrams տանկերով։

Հավելենք, որ Iron Sword 2015 զորավարժությունը 2-րդ անգամ է անցկացվում Լիտվայում, առաջին անգամ անցկացվել է 2014 թվականին։ Սա ՆԱՏՕ-ի՝ ռազմական պատրաստության և վարժանքների ծրագրի (MTEP — Military Training and Exercise Program) շրջանակներում իրականացվող զորավարժություն է։

Դեռևս 2014-ի զորավարժության ժամանակ Լիտվայի զինված ուժերի գլխավոր հրամանատար, գեներալ-մայոր (այն ժամանակ գեներալ-մայոր էր-Ռազմինֆո) Յոնաս Վիտաուտաս Ժուկասը հայտարարել էր, որ ՆԱՏՕ-ի 2014թ. Ուելսում կայացած գագաթաժողովից հետո Դաշինքը տարբեր միջոցառումներ է իրականացնելու, որոնց մի մասը կապված է Արևելյան Եվրոպայում անվտանգության ուժեղացմանը, ինչպես նաև ՆԱՏՕ-ի ներկայության ընդլայնմանը տարածաշրջանում։

Հարկ է նշել, որ մերձբալթյան երկրներն Արևելյան Եվրոպայում որպես սպառնալիք դիտարկում են Ռուսաստանին, քանի որ վերջինս էլ հաճախ լայնամասշտաբ զորավարժություններ է իրականացնում այդ երկրների տարածքներին սահմանակից շրջաններում։

Տեղեկացնենք, որ Լիտվայում անցկացվելու են նաև Baltic Host 2015, Arcade Fusion 2015, Maple Arche 2015 և Confidence 2015 զորավարժությունները։

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *