Ս-300-ի շուրջ ռուս-իրանական վեճը նոր զարգացումներ կարող է ունենալ

Ռուսական Կոմերսանտ թերթի տեղեկություններով՝ ՌԴ կառավարությունը որոշել է Իրանի միջուկային խնդրի հարցում ավելի խիստ դիրքորոշում որդեգրել Իրանի նկատմամբ, եթե վերջինս ետ չվերցնի Ռուսաստանի դեմ դատական հայցը։ Նույն աղբյուրի փոխանցմամբ՝ ՌԴ ԱԳՆ-ում դիվանագետներին արդեն իսկ ցուցում է տրվել Իրանի հետ բանակցություններում հանդես գալ հենց այդ դիրքերից:
Իրանը դիմել էր միջազգային արբիտրաժային դատարան՝ փոխհատուցում պահանջելով Ռուսաստանից Ս-300ԶՀՀ վաճառքի գործարքից հրաժարվելու համար։ Փոխհատուցման գումարը կազմում է շուրջ 4 մլրդ դոլար, որից, սակայն, ըստ Ռուսաստանում Իրանի դեսպանի, Իրանը պահանջել է միայն 900-ը, իսկ մնացածը դատարանն է ավելացրել։
Այս ֆոնին՝ Իրանի Արտաքին գործերի նախարարը հայտարարել է, որ Իրանը մտադիր է ատոմային էլեկտրակայանների կառուցման գործում շարունակել համագործակցությունը ռուսական կողմի հետ:
Հիշեցնենք, որ 2007 թվականին Ռուսաստանի և Իրանի միջև կնքված պայմանագրի համաձայն՝ ռուսական կողմը պարտավորվում էր Իրանին Ս-300ՊՄՈՒ-2 համակարգերի հինգ դիվիզոն տրամադրել: Սակայն 2010 թվականի սեպտեմբերի 22-ին ՌԴ նախագահ Դմիտրի Մեդվեդևը ստորագրեց հրամանագիր «ՄԱԿ-ի ԱԽ-ի՝ 2010 թվականի հունիսի 9-ին ընդունած 1929-րդ բանաձևի կատարումն ապահովող միջոցառումների մասին», որով արգելվում էր Իրանին ժամանակակից ռուսական զինամթերքի, այդ թվում Ս-300-ների տրամադրումը: Արդյունքում Ռուսաստանը Իրանին վերադարձրեց 167 մլն դոլարի կանխավճարը: