Թուրքական օդուժը Սիրիայի հյուսիսում հարվածել է ԻՊ-ի հենակետերին

Հոկտեմբերի 31-ին Թուրքիայի օդուժը՝ ԱՄՆ-ի գլխավորած կոալիցիոն ուժերի հետ համատեղ, ավիահարվածներ է հասցրել Սիրիայի հյուսիսում «Իսլամական պետություն» ահաբեկչական կազմակերպության հենակետերին։ Այս մասին հաղորդում է թուրքական Անադոլու լրատվական գործակալությունը։

Թուրքիայի օդուժը թիրախավորել է հյուսիսային Սիրիայում ԻՊ-ի հենակետը։ Նկարը՝ Անադոլու լրատվական գործակալության

Գործակալության փոխանցմամբ՝ թուրքական F-16 կործանիչների ավիահարվածների արդյունքում ոչնչացվել է Թուրքիայի սահմանից 5 կմ հեռավորության վրա Հարեջելե-Հրբա ճանապարհի մոտակայքում գտնվող ԻՊ-ի ութ հենակետ։ Սպանվել է կազմակերպության ավելի քան 50 և վիրավորվել՝ 30 զինյալ։

Թուրքիայի ԶՈւ ռազմաօդային ուժերի F-16 կործանիչներ

Հիշեցնենք, որ վերջին անգամ թուրքական օդուժը ԻՊ-ի դեմ ավիահարվածներ իրականացրել է հուլիսի 24-ին Իրաքի հյուսիսում։

Նշենք նաև, որ Թուրքիան «Իսլամական պետություն» ահաբեկչական կազմակերպության դեմ ԱՄՆ-ի գլխավորած միջազգային կոալիցիային միանալու պայմանագրի մասին պաշտոնապես հայտարարել է  այս տարվա օգոստոսի 24-ին: