Պաշտպանության բանակի՝ հյուսիսային ուղղությամբ տեղակայված միավորումներից մեկի հրետանային մի շարք ստորաբաժանումներ օրերս անցկացրել են ցուցադրական մարտավարական զորավարժություն, որի ընթացքում կիրառել են նաև անօդաչու թռչող սարքեր: Այս մասին տեղեկացնում է ՊԲ մամուլի ծառայության «Գոյամարտ» հեռուստածրագրի՝ հոկտեմբերի 24-ի թողարկումը:
Ականանետային կրակ ՊԲ հրետանային ստորաբաժանումների զորավարժության ժամանակ
Միավորման հրետանու և հետախուզության պատասխանատու սպաների օգնությամբ զորավարժությանը ներգրավված ստորաբաժանումներն իրականացրել են տեղանքի հետախուզման, նշանակետերի հայտնաբերման, տվյալների հավաքագրման և մշակման, կրակային արդյունավետ խոցման վարժանքներ: Այդ ընթացքում ստորաբաժանումներն օգտագործել են նաև անօդաչու թռչող սարքեր, ինչի շնորհիվ զգալիորեն բարձրացվում է նշված գործողությունների արդյունավետության մակարդակը:
— Տեխնիկական միջոցները և անօդաչու թռչող սարքերի կիրառումը թույլ են տալիս հակառակորդին հասցնել մաքսիմալ և ճշգրիտ խոցում, ինչպես նաև հետախուզել հակառակարոիդ շարժերը և կարևոր նշանակետերը նրանց խորքում, — հայտնում է զորավարժությանը մասնակից զորամասերից մեկի հրամանատարի տեղակալ, փոխգնդապետ Նիկոլայ Մխիթարյանը, — Ունենք ահագին փորձ և´ մարտական կիրառմամբ, և´ զորավարժությունների ընթացքում, բայց չենք կանգնում ձեռքբերածի վրա: Ամեն օր զարգացնում ենք անօդաչու թռչող սարքերի կիրառումը մեր միավորումների, զորամասերի զորավարժություններում, ինչպես նաև մարտական կիրառման շրջաններում:
«Գոյամարտ» ծրագիրը նշում է, որ այն գործողությունները, որոնք իրականացվել են զորավարժությունների ընթացքում, լայնորեն կիրառվում են նաև իրական մարտական պայմաններում:
Զորավարժության ղեկավարությունը նշանակետերի խոցմանը հետևում է ԱԹՍ-ի տեսանկարահանման միջոցով
Հրետանու կրակային խոցման տեսանկարահանում ԱԹՍ-ով
Pingback: ՊԲ-ում անցկացվել են հրետանավոր սպաների հրամանատարական հավաքներ | Ռազմ.info