Ռազմաշաբաթ. Ադրբեջան. 18–24 հոկտեմբերի, 2015

Հրապարակվել է 2014թ․ Ռուսաստանի՝ Ադրբեջանին մատակարարած սպառազինության ցանկը • Հեռացումներ և ձերբակալություններ Ադրբեջանի ազգային անվտանգության նախարարությունում • Ադրբեջանի ԱԻՆ-ը զորավարժություն կանցկացնի Կասպից ծովում • Ադրբեջանցի մի խումբ զինծառայողներ վերապատրաստվել են Վրաստանում • Ադրբեջանի լրատվամիջոցները հայկական կողմին մեղադրել են Ադրբեջանի քաղաքացիների՝ ականի վրա պայթելու համար

Ադրբեջանցի զինծառայողները ամառային վերապատրաստման փուլ են անցել

• Ռուսաստանը հայտարարագրել է 2014թ․ Ադրբեջանին մատակարարած սովորական սպառազինության ցանկը, ըստ որի՝ 2014թ․ ընթացքում Ադրբեջանը ՌԴ-ից ստացել է 65 միավոր տանկ, 78 միավոր ՀՄՄ և 118 միավոր խոշոր տրամաչափի (100 մմ և ավելի) հրետանային միջոցներ։ Ենթադրաբար սրանք այն զինատեսակներն են, որոնց մասին հայտնի է դարձել 2011թ․ ռուս-ադրբեջանական զենքի մատակարարման խոշոր պայմանագրերից։

• Ադրբեջանի ազգային անվտանգության նախարարի հեռացումից հետո հոկտեմբերի 22-ին ձերբակալվել է նույն նախարարության մոնիթորինգային կենտրոնի, հակաահաբեկչական կենտրոնի, միջազգային կազմակերպված հանցավորության դեմ պայքարի գլխավոր վարչության 7 բարձրաստիճան աշխատակից։ Հոկտեմբերի 23-ին հայտնի է դարձել, որ նախարարությունից հեռացվել է ևս 9 աշխատակից, որոնցից 4-ը՝ գեներալ։

Հոկտեմբերի 21-ին Ադրբեջանի նախագահի հրամանագրով ԱԱՆ նորանշանակ տեղակալ և նախարարի պաշտոնակատար Մադաթ Գուլիևին շնորհվել է գեներալ-լեյտենանտի կոչում։ Հենց այս պաշտոնյան է Ադրբեջանի ԱԱ հաջորդ նախարարի ամենահավանական թեկնածուն։

• Նոյեմբերին Ադրբեջանի արտակարգ իրավիճակների նախարարությունը Ադրբեջանի պետական նավթային ընկերության որոնողափրկարարական աշխատանքների վարչության հետ համատեղ Կասպից ծովում կանցկացնի հրամանատարաշտաբային զորավարժություն։

• Հոկտեմբերի 16-ին Վրաստանի Սաչխերեի լեռնային պատրաստության դպրոցում ավարտվել է Ադրբեջանի զինված ուժերի զինծառայողների մի խմբի ամառային հիմնական պատրաստության փուլը։ Դասընթացն ադրբեջանցի ենթադրաբար 9 զինծառայողներն անցել են միայնակ՝ առանց այլ երկրների ներկայացուցիչների։

Ականի վրա պայթած Ադրբեջանցի քաղաքացի

• Հոկտեմբերի 18-19-ին Ադրբեջանի լրատվամիջոցները, ընթերցողին մոլորության մեջ գցելով, փորձել են հայկական կողմին մեղադրել այն բանի համար, որ Ադրբեջանի երկու քաղաքացիներ ադրբեջանական առաջնագծում պայթել են ականի վրա։

Ռազմաշաբաթը նաև՝

Հայաստանում

Վրաստանում

Թուրքիայում

Իրանում