Իրանի ՌԾՈւ ռազմանավերն այցելել են Կասպից ծովի ռուսաստանյան նավահանգիստ

Այսօր՝ հոկտեմբերի 21-ին, Իրանի ռազմածովային ուժերի կասպյան նավատորմի երեք ռազմանավեր բարեկամական այցով ժամանել են Կասպից ծովի ռուսաստանյան ափ և խարիսխ գցել Աստրախանում: Այս մասին տեղեկացնում է ՌԴ ՊՆ կայքը:

Իրանի ռազմածովային ուժերի «Դամավանդ» էսմինեցը

Իրանի ռազմածովային ուժերի «Դամավանդ» էսմինեցը

Իրանյան բարեկամական նավախմբի կազմում Ռուսաստան են ժամանել «Դամավանդ» էսմինեցը, «Փեյքան» և «Ջուշան» հրթիռային կատերները, որոնց անձնակազմը մի շարք միջոցառումների է մասնակցելու Ռուսաստանում:

Ավելի վաղ, Իրանի կասպյան նավատորմի ներկայացուցիչն իրանական «ԻՐՆԱ» գործակալության հայտնել է, որ ռազմանավերի այցը տևելու է մոտ երկու շաբաթ, իսկ հետ վերադարձին լինելու է նաև Բաքվում: Ընդ որում՝ սա իրանական նավատորմի ռազմանավերի երկրորդ նավարկությունն է դեպի Կասպից ծովի ռուսաստանյան նավահանգիստներ, նախորդ այցը եղել է 2013-ին: Կողմերի հավաստմամբ՝ փոխադարձ այցելությունների նպատակը նավատորմերի միջև բարեկամության հաստատումն է:

Այցի համատեքստում Իրանի ռազմանավերից մեկի հրամանատար Ահմադ Ռեզա Բաղարին «Ֆարսնյուզ» գործակալության հայտնել է, որ իրանական նավատորմը պատրաստ է նաև զորավարժություն անցկացնել ռուսաստանյան ռազմանավերի մասնակցությամբ:

Ավելացնենք, որ օգոստոսին իրենց հերթին նմանատիպ այցով Իրանում են եղել Ռուսաստանի կասպյան նավատորմի ռազմանավերը: Այցելության ընթացքում ռուսաստանյան և իրանյան ռազմանավերն անցկացրել են համատեղ զորավարժություն, որին մասնակցել են 200 իրանցի և 150 ռուսաստանցի զինծառայողներ: Դա ռուսաստանյան ռազմանավերի արդեն երրորդ այցելությունն էր Իրան:

2 responses to “Իրանի ՌԾՈւ ռազմանավերն այցելել են Կասպից ծովի ռուսաստանյան նավահանգիստ

  1. Pingback: Ռուսաստանը և Իրանը զորավարժություններ են անելու Կասպից ծովում | Ռազմ.info

  2. Pingback: Իրանի ռազմանավերը վերադարձել են դեպի Ռուսաստան նավարկությունից | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *