Սիրիայի նախագահ Բաշար Ասադը երեքշաբթի՝ հոկտեմբերիվ 20-ին, աշխատանքային այցով մեկնել է Մոսկվա և հանդիպել ՌԴ նախագահ Վլադիմիր Պուտինին։ Այցի շրջանակներում հանդիպումներ են եղել նեղ և ընդլայնված շրջանակներով։ Այս մասին հայտնում է «ՌԻԱ Նովոստի» լրատվական գործակալությունը՝ հղում անելով ՌԴ նախագահի մամուլի խոսնակ Դմիտրի Պեսկովին։
Ընդլայնված հանդիպմանը մասնակցել են նաև ՌԴ արտգործնախարար Սերգեյ Լավրովը և պաշտպանության նախարար Սերգեյ Շոյգուն։ Կողմերը քննարկել են հակաահաբեկչական պայքարի խնդիրները և Սիրիայում ծայրահեղական խմբավորումների դեմ ՌԴ գործողությունների շարունակականության հարցերը։ Ներկայացվել են Սիրիայի իրավիճակը, ծրագրերի հեռանկարները, ինչպես նաև երկկողմ հարաբերությունների տարբեր կողմեր։
Սիրիայի նախագահի հետ հանդիպման ժամանակ Պուտինը հույս է հայտնել, որ իրենց պայքարը ահաբեկիչների դեմ շուտով արդյունք կտա, և հավելել, որ նման խնդիրների վերջնական լուծումը քաղաքական գործընթացն է, որին պետք է մասնակցեն Սիրիայի բոլոր էթնիկ ու կրոնական խմբերը։
Նշենք, որ ներկայում Ռուսաստանի աջակցությամբ սիրիական կառավարական բանակը փորձում է Սիրիայի տարածքը մաքրել ահաբեկիչներից, որոնք փակել են երկրի՝ կառավարության համար կենսական նշանակության արևմտյան հատվածը։
Սեպտեմբերի 30-ից Ռուսաստանը Սիրիայի նախագահ Բաշար Ասադի խնդրանքով սկսել է կետային ավիահարվածներ հասցնել Սիրիայում ԻՊ-ի ահաբեկիչների դիրքերին՝ օգտագործելով Սու-25 գրոհիչներ, Սու-24Մ, Սու-34 ռմբակոծիչներ, իսկ օդային աջակցությունն իրականացնում են Սու-30ՍՄ կործանիչները։
Ռուսաստանի հետ Սիրիային օգնում է նաև Իրանը, որը ռազմական խորհրդատուներ է ուղարկել Սիրիա՝ տեղի զինվորականներին վերապատրաստելու, մարզելու համար: Ու թեև արևմտյան լրատվամիջոցները նշում են, որ Իրանը նաև զինված ստորաբաժանումներ ունի Սիրիայում, սակայն իրանական պաշտոնյաները մշտապես հերքում են Իրանի զինված ուժերի ներկայությունը Սիրիայում: