Վլադիկավկազում ահաբեկչության վտանգի պատճառով մարդիկ տարհանվել են շուկաներից և մանկապարտեզներից

Ահաբեկչության վտանգի պատճառով վերջին հինգ օրերի ընթացքում արդեն երրորդ անգամ փակվել են Վլադիկավկազի շուկաներն ու մանկապարտեզները, մարդիկ տարհանվել են: Այդ մասին լրագրողներին հայտնել է Վլադիկավկազի ՆԳՆ մամլո ծառայության ղեկավար Ալլա Ախպոլովան:
Հիշեցնենք, որ օգոստոսի 2-ին Վլադիկավկազի ոստիկանությունում շուկաներից մեկում ռումբի տեղադրման վերաբերյալ ահազանգ էր ստացվել, որի պատճառով մարդիկ տարհանվել էին քաղաքի բոլոր հինգ շուկաներից: Կարճ ժամանակ անց, սակայն, պարզ է դարձել, որ ահազանգը կեղծ էր: Դեպքի առիթով ձերբակալվել է 21-ամյա մի երիտասարդ, ով խոստովանական ցուցմունք է տվել:
Օգոստոսի 4-ին ոստիկանության աշխատակցի հեռախոսին SMS հաղորդագրություն էր ստացվել Վլադիկավկազի շուկայում ռումբի առկայության մասին: Քաղաքի բոլոր շուկաների, ինչպես նաև մանկապարտեզների զննությունը ցույց է տվել, որ այս անգամ ևս ահազանգը կեղծ էր:
Ինգուշեթիայում գործուղման մեջ գտնվող ոստիկանի հեռախոսին կրկին SMS հաղորդագրություն է ստացվել հնարավոր ահաբեկչության մասին: Մարդիկ տարհանվել են շուկաներից և մանկապարտեզներից: Դեպքի վայրում աշխատում են կինոլոգները:
Ալլա Ախպոլովայի խոսքերով՝ ներկայումս Ինգուշեթիայի երկու բնակիչներ, որոնց նկատմամբ հետախուզություն է հայտարարվել, կասկածվում են հնարավոր ահաբեկչության կազմակերպման մեջ: Նրանցից մեկը 1988 թվականին ծնված Միքաիլ Օզդոևն է, ով նախկինում մեկ անգամ դատապարտվել է զենքի ապօրինի շրջանառության համար, մյուսը՝ 1988 թվականին ծնված Թիմուր Օրցխանովն է:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *