Թուրքիայի քրդաբնակ շրջաններում «Քրդստանի աշխատավորական կուսակցության» (PKK) և Թուրքիայի ուժայինների միջև բախումներում այսօր՝ հոկտեմբերի 12-ին՝ 16։16-ի դրությամբ սպանվել է PKK-ի 17 զինյալ, ձերբակալվել է DBP-ի 2 անդամ, 19 քաղաքացիական, հայտնաբերվել է պայթուցիկ սարքեր, ականներ: Ռազմինֆոն հետևում է իրադարձություններին և թարմացնում օրվա լրահոսը։
Իհլաս․․ Թուրքիայի արևելյան Էրզրում նահանգի Շենքայա և Արդահան նահանգի Գյոլե գավառներում անվտանգության ուժերի հատուկ գործողության ադյունքում ոչնչացվել է PKK-ի զինյալների 2 ապաստարան։ Առգրավվել է մեծ քանակությամբ զենք-զինամթերք։
Դողան․ Թուրքիայի արևելյան Արդահան նահանգում անվտանգության ուժերի հատուկ գործողության արդյունքում PKK-ի անդամ լինելու կասկածանքով 16 քաղաքացիական է ձերբակալվել։
Թուրքիայի ԶՈւ ԳՇ կայք․ Թուրքիայի հարավարևելյան Հաքքարի նահանգում ուժայինների օդային գործողության արդյունքում սպանվել է PKK-ի 17 զինյալ։ Ոչնչացվել է 3 ապաստարան, 1 զինանոց և մի քանի հենակետ, առգրավվել է մեծ քանակությամբ զենք-զինամթերք։
Ջումհուրիեթ․ Թուրքիայի քրդամետ «Ժողովուրդների դեմոկրատական կուսակցության» (HDP) պատգամավոր Էրուղրուլ Քյուրքչյուն հայտարարել է, որ կուսակցության՝ մինչև նոյեմբերի 1-ը ծրագրավորած շուրջ 10 հանրահավաք կարող է չեղյալ հայտարարվել։
Մենք չենք կարող ձևացնել, թե ոչ մի պատերազմ չկա։ Մեր հանրահավաք անելու ընթացքում մեր մարդկանց են սպանում։
Զաման․ Թուրքիայի հարավարևելյան Շրնաք նահանգում PKK-ի զինյալի դին ոստիկանական զրահամեքենայից կապած և փողոցում քարշ տված երկու ոստիկաններն ազատվել են աշխատանքից։
PKK-ի զինյալի դին փողոցում քարշ տված ոստիկաններն ազատվել են աշխատանքից։ Նկարը՝ Զաման պարբերականի
Իհլաս․ Թուրքիայի հարավարևելյան Մուշ նահանգի Բուլանըք գավառում անվտանգության ուժերի հատուկ գործողության արդյունքում PKK-ի զինյալների հետ համագործակցության կասկածանքով երեք քաղաքացիական է ձերբակալվել։ Կասկածյալների մոտ հայտնաբերվել են մեծ քանակությամբ պայթուցիկ նյութեր։
Դողան․ Թուրքիայի հարավարևելյան Վան նահանգի Չաթաք և Բաշքալե գավառներում PKK-ի զինյալների դեմ գործղություններ իրականացնելու և բնակչության անվտանգությունը ապահովելու համար մինչև հոկտեմբերի 27-ը հայտարարվել է 15 օրյա արտակարգ դրություն։
Սաբահ․ Թուրքիայի արևելյան Իգդիր նահանգում PKK-ի անդամ լինելու մեղադրանքով ձերբակալվել են «Դեմոկրատական շրջաններ կուսակցության» (DBP) անդամներ Նեվզաթ Աքփոլաթը և Հանդե Քայան։
Անադոլու․ Թուրքիայի հարավարևելյան Մարդին նահանգի Դարգեչիթ գավառում հոկտոմբերի 10-ից հայտարարված պարետային ժամից հետո ուժայինները հատուկ գործողություններ են ձեռնարկել PKK-ի զինյալների դեմ, փակել են խրամատները, հանել բարիկադները։ Ինչպես նաև որոնողական աշխատանքների ընթացքում հայտնաբերել և ոչնչացրել են ինքնաշեն 5 պայթուցիկ սարք։ Գործողությունները դեռ շարունակվում են։
Դիարբեքիրի Բաղլար գավառում դիմակավորված անձինք ավտոբուս են այրել։
Անադոլու․ Թուրքիայի հարավարևելյան Դիարբեքիր նահանգի Բաղլար գավառի Սենթո պողոտայում դիմակավորված անձինք բարիկադներ են դրել, կանգնեցրել մեքենաները և փակել ճանապարհը։ Այնուհետև պայթուցիկ շշեր են նետել և այրել ավտոբուսներից մեկը։ Նրանց գործողություններին միջամտելու համար դեպքի վայր են ուղարկվել ոստիկանական խմբեր։
Ստամբուլում անհայտ անձինք հարձակվել են ԱԶԿ-ի գրասենյակի վրա։
Անադոլու․ Ստամբուլի Էսենյուրթ թաղամասում անհայտ անձինք քարեր են նետել իշխող «Արդարություն և զարգացում» կուսակցության Քուզույոլու փողոցի գրասենյակի վրա։ Ոստիկանությունը գործողություններ է ձեռնարկել հարձակումը իրականացնողներին հայտնաբերելու համար։
Շրնաք նահանգի Դերեբաշը գյուղի շրջանում ուժայինները հայտնաբերել են պայթուցիկ սարքեր, ականներ։
Անադոլու․ Թուրքիայի հարավարևելյան Շրնաք նահանգի Չաքրսյողութ գյուղի ժանդարմերիայի 1-ին դիվերսիոն բրիգադի հրամանատարության ջոկատները Դերեբաշը և Անըլմըշ գյուղերի շրջանում հատուկ գործողություններ են իրականացրել PKK-ի զինյալների դեմ։ Որոնողական աշխատանքների արդյունքում հայտնաբերվել և ոչնչացվել են ինքնաշեն պայթուցիկ սարքեր, 2 ական և այլ զինամթերք։
Հիշեցնենք, որ թուրք-քրդական հարաբերությունների՝ վերջին շաբաթների սրման պատճառը հուլիսի 20-ին Թուրքիայի հարավային Սուրուչ քաղաքում քրդերի դեմ ձեռնարկված ահաբեկչությունն էր, որի համար թուրքական իշխանությունները մեղադրեցին «Իսլամական Պետության» (ԻՊ) զինյալներին, իսկ քրդերը՝ նաև թուրքական իշխանություններին։ Սրան հաջորդեցին Թուրքիայում քրդերի և ԻՊ կողմնակիցների ձերբակալությունները։
Հուլիսի 23-ին ԻՊ ահաբեկիչների կրակոցներից զոհվեց թուրք-սիրիական սահմանում ծառայություն իրականացնող Թուրքիայի ԶՈւ մեկ ենթասպա, ևս երկու զինծառայող վիրավորվեցին, ինչին ի պատասխան թուրքական օդուժը սկսեց Սիրիայում և Իրաքում հարվածել ԻՊ-ի ու նաև «Քրդստանի աշխատավորական կուսակցության» (PKK) դիրքերին:
Լրահոսը թարմացնում են Սոնա Սուքիասյանը, Նանե Մանասյանը, Անահիտ Չալիկյանը