Հոկտեմբերի 5-ին պաշտոնական այցով Ադրբեջան ժամանած՝ Թուրքիայի զինված ուժերի գլխավոր շտաբի պետ, բանակի գեներալ Հուլուսի Աքարը հոկտեմբերի 8-ին այցելել է Ադրբեջանի զինված ուժերի 3-րդ բանակային կորպուս (շտաբը՝ Շամքոր)։ Այս մասին հայտնում է Ադրբեջանի ՊՆ մամուլի ծառայությունը։
Այցի ընթացքում ԶՈւ ԳՇ պետին ուղեկցել է Ադրբեջանի պաշտպանության նախարար, գեներալ-գնդապետ Զաքիր Հասանովը։
Հաղորդագրությունում նշվում է, որ այցի ընթացքում թուրք բարձրաստիճան զինվորականը ծանոթացել է բանակային կորպուսի կազմին, մարտական պատրաստությանը, մատակարարման կազմակերպմանը և կենցաղային նշանակության մի շարք օբյեկտներին՝ «գոհ մնալով արձանագրված արդյունքներից»։
Այցի ընթացքում Հուլուսի Աքարը ի նշան բարեկամության, թուրքական զինուժի հուշամեդալ է հանձնել 3-րդ բանակային կորպուսին, որն ընդունել է միավորման հրամանատար, գեներալ-լեյտենանտ Ռովշան Աքպերովը։
Հիշեցնենք, որ ավելի վաղ Հուլուսի Աքարին ընդունել էին Ադրբեջանի Նախագահը, պաշտպանության նախարարն ու սահմանապահ պետական ծառայության պետը։
Pingback: Ռազմաշաբաթ․ Ադրբեջան․ 4 — 10 հոկտեմբերի, 2015 | Ռազմ.info