ՊԲ զինծառայողները հրետանային մենամարտում ոչնչացրել են հակառակորդի հրետանային հաշվարկը

Սեպտեմբերի 28-ին Ադրբեջանի ՊՆ-ն հայտնեց, որ հայ-ադրբեջանական ուժերի շփման գծում ընթացել են մարտեր, ինչի հետևանքով «ադրբեջանական բանակն ունի 3 սպանված»։ Հրապարակվել էին նաև նրանց անունները, որոնց թվում և ժամկետային զինծառայող Մուսթաֆազադե Զյոհրաբ Նամիգ օղլուն (Mustafazadə Zöhrab Namiq oğlu)։ «Այլ մանրամասներ զինծառայողների սպանվելու հանգամանքների մասին Ադրբեջանի ՊՆ-ն չէր ներկայացրել»։

Զոհված զինծառայող Զյոհրաբ Մուսթաֆազադեի մայրը՝ որդու նկարը ձեռքին

Սեպտեմբերի 30-ին, սակայն, ադրբեջանական ընդդիմադիր «Յենի Մուսավաթ» թերթի կայքը հրապարակեց հարցազրույց սպանված զինծառայող Զյոհրաբ Մուսթաֆազադեի մոր հետ, ով իր խոսքում որոշ մանրամասներ է ներկայացրել որդու զոհվելու վերաբերյալ։ Հրապարակումից պարզվել է նաև, որ դեպքը եղել է Ֆիզուլու շրջանի Ալախանլը գյուղի մոտակայքում։

Զոհվածի մոր պատմածը նաև նոր հարցեր է առաջացնում, ուստի ուղիղ կմեջբերենք նրա խոսքերը։

«Զյոհրաբը հրետանավոր էր։ Ծառայակիցները պատմել են, որ թշնամու դեմ ընթացող ծանր մարտերի ժամանակ հրետանավորների արանքում արկ է ընկել։ Բեկորներից մեկը դիպել է Զյոհրաբի ճակատին, մյուսը՝ ուղիղ սրտին։ Զինվորներից մեկը ծանր վիրավորվել է, մյուս երեքը տեղում մահացել են»։

Զոհված զինծառյողի մոր մեջբերված խոսքի բնօրինակն ադրբեջանական կայքում

Սա մեծ հավանականությամբ նշանակում է, որ խոսքը հրետանային մենամարտի մասին է, քանի որ նշվում է, որ ադրբեջանցի հրետանավորները մղում էին մարտեր, երբ նրանց կողքին պայթել է հայկական արկը»: Բացի այդ, բացահայտվում է, որ ադրբեջանական կողմն ունեցել է առնվազն մեկ ծանր վիրավոր, որի մասին չի հայտարարվել։ Կասկածի տեղիք է տալիս նաև նշված 3 սպանվածների մասին տեղեկությունը, քանի որ պարզ չէ, թե արդյոք դրանք հենց այն 3 կորուստներն էին, որոնց մասին սեպտեմբերի 28-ին հայտնել էր Ադրբեջանի ՊՆ-ն, թե՞ հայտարարված կորուստները եղել են տարբեր վայրերում։ Երկրորդ տարբերակով ստացվում է, որ Ադրբեջանի պաշտոնական աղբյուրները չեն հայտնել իրենց բոլոր կորուստների մասին։

Ամեն դեպքում, կարող ենք արձանագրել, որ հայ հրետանավորները մենամարտում ոչնչացրել են հակառակորդի հրետանային հաշվարկը։

Հիշեցնենք, որ այդ օրերին ընթանում էին հայկական կողմի պատժիչ գործողությունները, որին նախորդել էր պաշտպանության բանակի՝ թիկունքում տեղակայված զորավարժարանի հրետակոծումը, ինչի արդյունքում հայկական կողմն ուցել էր 4 զոհ։