Ահազանգը կեղծ էր

Երեկ ռուսական լրատվամիջոցները տեղեկություն էին տարածել այն մասին, որ Վլադիկավկազի իրավապահ մարմինների աշխատակիցները քաղաքի բոլոր շուկաներից տարհանում են մարդկանց: Պատճառը ոստիկանության հերթապահ բաժնում ստացված անանուն զանգն էր, թե իբր քաղաքի շուկաներից մեկում ռումբ է տեղադրված:
Քաղաքի բոլոր հինգ շուկաների զննության արդյունքում ոստիկանության հատուկ ստորաբաժանման աշխատակիցների կողմից պայթուցիկ սարք չի հայտնաբերվել:
Այժմ ոստիկանությունը անհրաժեշտ միջոցառումներ է իրականացնում զանգողի ինքնությունը ճշտելու համար:
Նշենք, որ Վլադիկավկազի Կենտրոնական շուկայում նախկինում մի քանի անգամ ահաբեկչություն է տեղի ունեցել. 1999 թվականի մարտին Կենտրոնական շուկայում տեղի ունեցած պայթյունի հետևանքով զոհվել էր 52, վիրավորվել՝ ավելի քան 300 մարդ: 2002 թվականին նույն վայրում պայթյունը խլել էր 10 մարդու կյանք, վիրավորվել էր 40-ը:
2008 թվականի նոյեմբերին Կենտրոնական շուկային մոտ կանգառում մահապարտ-ահաբեկչի իրականացրած պայթյունի հետևանքով զոհվել է 12, վիրավորվել 38 մարդ:
2010 թվականի սեպտեմբերին Կենտրոնական շուկայի մուտքի մոտ «Վոլգա» մեքենայում գտնվող մահապարտը 30-40 կգ տրոտիլ հզորաությամբ ռումբ էր պայթեցրել: Պայթյունի հետևանքով զոհվել էր 17, վիրավորվել՝ 190-ից ավելի մարդ: